ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ދިވެއްސެއްގެ ފޮށިން އެއް ކިލޯ އަށް ވުރެ ގިނަ މަސްތުވާތަކެތި ފެނުނު މައްސަލާގައި ދައުލަތުން ކުރި ދައުވާ ސާބިތުނުވާ ކަމަށް ނިންމައިފިއެވެ.
މިމައްސަލައިގައި ދައުވާ ކޮށްފައިވަނީ އަހުމަދު އިރުފާން ނަމަކަށް ކިޔާ މީހަކަށެވެ. އޭނާގެ މައްޗަށް ދައުލަތުން ކުރީ މަސްތުވާތަކެތި އެތެރެކުރުމުގެ ކުށުގެ ދައުވާއެވެ.
ސްރީ ލަންކަން އެއާލައިންސްގެ ފްލައިޓަކުން އިރުފާން ގެނައި ފޮށިގަނޑެއް ތެރެއިން 1،475.8 ގްރާމްގެ ޑައިފޯމިން ހުރި ރަބަރު ޕެކެޓުތަކެއް ކަސްޓަމްސް އިން ވަނީ އަތުލައިގެންފައެވެ.
މިމައްސަލައާ ގުޅިގެން ކުރި ހުކުމުގައި ބުނީ، މަސްތުވާތަކެތި ފެނުން ފޮއްޓަކީ އެހެން މީހަކު އިރުފާނާ ހަވާލުކުރި ފޮއްޓެއް ކަމަށެވެ. އަދި އޭގައި މަސްތުވާތަކެތި ހުރިކަން އޭނާއަށް ނޭނގޭ ކަމަށް ދިފާއުން ބުނެފައިވާ ކަމަށް ހުކުމުގައި ވަނީ ބުނެފައެވެ.
މީގެ އިތުރުން އެ ފޮށި ރާއްޖެ ގެނައީ އޭގައި މަސްތުވާތަކެތި ހުރިކަން އިރުފާނަށް އެނގިހުރެގެން ކަމަށް ދައުލަތަށް ސާބިތުކޮށް ނުދެވޭ ކަމަށް ވެސްހުކުމުގައި ބުނެއެވެ.
ހުކުމުގައި އިތުރަށް ބުނީ، ތަހުގީގު މަރުހަލާގައި އަދި ޗެއިން އޮފް ކަސްޓަޑީގައި ވެސް ގޯސްތަކެއް ހުރި ކަމަށާއި އެހެންކަމުން މަސްތުވާތަކެތި އެތެރެކުރުމުގެ ކުށް އިރުފާންގެ މައްޗަށް ޝައްކެއް ނެތް މިންވަރަށް ސާބިތު ނުވާ ކަމަށް މި މައްސަލަ ބެއްލެވި ގާޒީ އާދަމް މުހައްމަދު ވަނީ ހުކުމް ކުރައްވާފައެވެ.
ފޮށިފޮށީގައި މަސްތުވާ ތަކެތި ގެނެސްގެން ކަސްޓަމުން އަތުލައިގަތުމުން، ތިޔައީ މައެޅި ތަކެއްޗެއްނޫނޭ ބުނެގެން ސަލާމަތްވާ ހަމައެކަނި ޤައުމު، ކޮންޤައުމު؟ އެންމެ ބޭފުޅުންގެ ދިވެހިރާއްޖެ.