އަންނަ މަހު މާލޭ ސިޓީގައި މިނީބަހުގެ ޚިދުމަތް ދޭން ފަށާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ، އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ ހުޅުމާލޭގެ ދެވަނަ ފިޔަވަހިން ސީދާ ބަސް ދަތުރުތައް ފެށުމަށް އެމްޓީސީސީން ބޭއްވި ރަސްމިއްޔާތެއްގައި ވާހަކަ ދައްކަވަމުންނެވެ.
އާޒިމް ވިދާޅުވީ މާލޭގެ ރައްޔިތުން އެތައް ޒަމާނަކު އިންތިޒާރު ކުރަމުން އައި މިނީ ބަހުގެ ހިދުމަތް އަންނަ ޖުލައި މަހުގެ ތެރޭގައި ފަށާނެ ކަމަށެވެ.
2020 ވަނަ އަހަރު މިނީބަހުގެ ހިދުމަތް ފަށަން ނިންމާ އެކަން ކުރުމަށްޓަކައި 2019 ވަނަ އަހަރު އެމްޓީސީސީއާއެކު އެއްބަސްވުމެއްގައިވެސް ވަނީ ސޮއިކޮށްފައެވެ. އަދި މާލެއަށް މިނީ ބަހުގެ ހިދުމަތް ތައާރަފުކުރުމަކީ ރައީސް އިބްރާހިމް މުހައްމަދު ސޯލިހުގެ 100 ދުވަހުގެ ވައުދުފުޅެކެވެ. އެހެންނަމަވެސް މި ސަރުކާރަށް ހަތަރު އަހަރުވާން ކައިރިވެފައި ވާއިރުވެސް އެ ވައުދު ނުފުއްދި އޮތް އިރު އެ ހިދުމަތް ފަށަން ތަފާތު ތާރީހުތައް ވެސް މީގެ ކުރިން ދީފައި ވެއެވެ. ނަމަވެސް ފެށިފައެއް ނުވެއެވެ.
މިކަމާ ގުޅިގެން ޓްރާންސްޕޯޓު މިނިސްޓަރު އައިޝަތު ނަހުލާ ވަނީ އެކި ފަހަރު މަތިން ސުވާލުކުރުމަށް މަޖިލީހަށް ވެސް ހާޒިރުކޮށްފައެވެ. އެހެންނަމަވެސް މިނީ ބަހުގެ ހިދުމަތް ނުފެށި ލަސްވެފައި ވަނީ އެކަމަށް ބޭނުންވާ ވަރަށް ފައިސާ ނެތުމުން ކަމަށާއި ހިލޭ އެހީގެ ދަށުން ފައިސާ ހޯދަން މަސައްކަތް ކުރަމުންދާ ކަމަށް މިނިސްޓަރު ނަހުލާ އެކުފަހަރު ވިދާޅުވެފައި ވެއެއެވެ.
މިހާރު މާލެ ސަރަހައްދުގައި 46 ބަސް ދުއްވަމުން އަންނަ އިރު މިނީ ބަސްތަކާއެކު އަދަދު 70 އާ ގާތް ކުރާނެއެވެ. މިނީ ބަހުގެ ހިދުމަތް ފަށާއިރު 15-20 މީހުންވެ ޖާގައިގެ 15 ވަރަކަށް ބަސް ގެނައުމަށް ވަނީ އަމާޒު ހިފާފައެވެ.
މާލެ އަށް މިނީބަސް ތައާރަފު ވެގެން ދިޔުމުން ދަތުރުފަތުރަށް ހެޔޮ ބަދަލެއް އަންނާނެއެވެ.
