އެތައް އަހަރެއް ވަންދެން ދަރިން ސްކޫލަށް ނުފޮނުވައި، ދަރިއެއްގެ ކައިވެނި އަމިއްލައަށް ކޮށްދިން ބައްޕައެއް ގާތްގަނޑަކަށް އެއް އަހަރާއި ހަތަރު މަހަށް ޖަލަށް ލާން ހުކުމްކޮށްފިއެވެ.

މީގެ ތިން އަހަރު ކުރިން ފެންމަތިވި އެ މައްސަލައިގައި ދައުލަތުން އޭނާގެ މައްޗަށް ދައުވާކުރީ އޭނާގެ ތިން އަންހެން ކުދިން ސްކޫލަށް ނުފޮނުވުމުންނާއި، 2018 ގައި އޭނާގެ އެހެން ކުއްޖެއްގެ ކައިވެންޏެއް އަމިއްލައަށް ކޮށްދީފައިވާތީއެވެ.

އެ މައްސަލަ ސަމާލުކަމަށް އައިސް ކުރި ތަހްގީގުތަކުން ހާމަވި ގޮތުގައި:

  • 17 އަހަރުގެ ކުއްޖާ ފޮނުވީ ގްރޭޑް 3 އާ ހަމައަށް
  • 16 އަހަރުގެ ކުއްޖާ ފޮނުވީ ގްރޭޑް 1 އާ ހަމައަށް
  • 12 އަހަރުގެ ކުއްޖާ ފޮނުވީ ޔޫކޭޖީ އާ ހަމައަށް
  • 20 އަހަރުގެ ކުއްޖެއް ވެސް ހުރިއިރު އޭނާ ފޮނުވީ ގްރޭޑް 5 އާ ހަމައަށް

ޝަރީއަތުގައި ވާހަކަ ދައްކަމުން އޭނާ ބުނީ އެ ކުދިން ސްކޫލަށް ނުފޮނުވީ:

  • ދެ ޖިންސު މަސްހުނިކޮށްގެން ކިޔަވައިދޭތީ
  • ލަވަ އާއި މިއުޒިކް ޖަހާތީ
  • ނަމާދަށް ދާން ހުރަސް އެޅޭ ގޮތަށް ސްކޫލުން އަމަލު ކުރާތީ

އޭނާ ބުނި ގޮތުގައި ސްކޫލަށް ނުފޮނުވުމަކީ ކުށެއް ކަން އޭނައަކަށް ނޭނގެއެވެ. އަދި ދަރިފުޅުގެ ކައިވެނި ކޮށްދީފައި ވަނީ ދީނީ ގޮތުން އެކަން ކުރެވޭތީ އާއި، އެކަން ނުކުރެވޭނެ ދަލީލެއް ފެންނަން ނެތުމުން ކަމަށްވެސް އޭނާ ބުންޏެވެ.

ދައުލަތުން އޭނާގެ މައްޗަށް ކޮށްފައިވަނީ ގާނޫނު ހިންގަން ހުރަސް އެޅުމުގެ ދައުވާ އާއި، ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގައި ކުރުމުގެ ދައުވާއެވެ.

މައްސަލަ ބެއްލެވި ގާޒީ އަލީ ނަދީމް އިއްވެވި ހުކުމްގައި ވިދާޅުވީ، އަމިއްލަ ވިސްނުންތަކެއްގެ ސަބަބުން ދަރިންގެ ތައުލީމަށް ހުރަސް އެޅުމުގެ ހައިސިއްޔަތެއް އެ މީހާއަކަށް ނެތް ކަމަށާއި، އެ މީހާ ދީނީ އިލްމު ކިޔަވައިގެން ނެތް ކަމަށްވާއިރު، ކަން އޮންނަ ގޮތް އޮޅުން ފިލުވުމަށް ވެސް މަސައްކަތްކޮށްފައި ނުވާ ކަމަށެވެ.

އެހެންކަމުން، ގާޒީ ވަނީ އޭނާ އަށް އެއް އަހަރާއި ތިން މަހާއި 20 ދުވަހުގެ ޖަލު ހުކުމެއް އިއްވައިފައެވެ. އެގޮތުން:

  • ގާނޫނު ހިންގަން ހުރަސް އެޅި ކަމުގެ ކުށުގައި އެއް އަހަރު
  • ހުއްދަނެތި ކައިވެނިކޮށްދިނުމުން ތިން މަހާއި 20 ދުވަސް (ހުކުމުގައި ވާ ގޮތުން އޭނާ ހުންނަން ޖެހޭނީ ހަތަރު މަހާއި 24 ދުވަސް ވަންދެން، ނަމަވެސް ބަންދުގައި ހުރި މުއްދަތު ވަނީ އުނިކޮށްފަ)

ނަމަވެސް، އޭނާ ވަނީ އެ އަދަބު ޖޫރިމަނާއަކަށް ބަދަލުކޮށްދޭން އެދިފައެވެ. އެކަމަކު ގާޒީ ވިދާޅުވި ގޮތުގައި، އެ މީހާގެ އަމަލުތަކުގެ ސަބަބުން، ގެއްލިގެންދިޔަ ދަރިންގެ މުސްތަގްބަލާއި ތަރުބިއްޔަތެއް އަނބުރާ ހޯދައެއް ނުގަނެވޭނެއެވެ. އެހެންކަމުން ޖޫރިމަނާއަކަށް އަދަބު ބަދަލު ނުކުރުމަށް ގާޒީ ނިންމެވީއެވެ.

ހަބަރު ކްރިމިނަލް ކޯޓް އެޑިއުކޭޝަން ޕޮލިސް