އެމްޓީސީސީގެ އާންމު ބަސް ދަތުރުފަތުރުގެ ހިދުމަތުގައި ޝާމިލުވާ ބަސް ޑްރައިވަރުންނާއި ކޮންޑަކްޓަރުންނަށް ހާއްސަކޮށްގެން ހިންގޭ މަގުމަތީގެ ސަލާމަތާއި ރައްކާތެރިކަމާއިގުޅޭ ސިލްސިލާ ޕްރޮގްރާމެއް ފަށައިފިއެވެ.
އެމްޓީސީސީއިން ބުނީ އެ ކުންފުންޏާއި މޯލްޑިވްސް ޕޮލިސް ސާވިސް ގުޅިގެން އެމްޓީސީސީގެ އާންމު ބަސް ދަތުރުފަތުރުގެ ހިދުމަތުގައި ޝާމިލުވާ ބަސް ޑްރައިވަރުންނާއި ކޮންޑަކްޓަރުން މަގުމަތީގެ ސަލާމަތާއި ރައްކާތެރިކަމާއިގުޅޭ ގޮތުން ހޭލުންތެރިކުރުމުގެ ސިލްސިލާ ޕްރޮގްރާމެއް ފަށާފައިވާ ކަމަށެވެ.
މިމަހުގެ 4 ވަނަ ދުވަހުން ފެށިގެން 5 ދުވަހުގެ ނިޔަލަށް ކުރިއަށްދާ އެ ޕްރޮގްރާމްގައި ސެޝަންތައް ނަންގަވައިދޭނީ މޯލްޑިވްސް ޕޮލިސް ސާވިސްގެ ޓްރެފިކް ޕޮލިހުގެ މުދައްބިރުނެވެ.
އެ ސިލްސިލާ ޕްރޮގްރާމުގައި އެމްޓީސީސީގެ 150 މުވައްޒަފުން ބައިވެރިވެފައިވާއިރު ރާއްޖޭގެ އެއްގަމު ދަތުރުފަތުރު އެންމެ ފުޅާކޮށް ފޯރުކޮށްދޭ ކުންފުނީގެ ހައިސިއްޔަތުން އެމްޓީސީސީއިން ބުނީ މަގުސަދަކީ އާންމު ބަސް ދަތުރުފަތުރުގެ ހިދުމަތުގައި މަސައްކަތްކުރާ ޑްރައިވަރުންނާއި ކޮންޑަކްޓަރުންނަކީ މަގުމަތީގެ ސަލާމަތާއި ރައްކާތެރިކަމަށް ހާއްސަ ސަމާލުކަމެއްދޭ ބައެއްގެ ގޮތުގައި ތަމްރީންވެގެން ދިއުން ކަމަށެވެ.
