މާރާމާތީތަކާ ގުޅިގެން އައްޑޫ ސިޓީގައި އަމާންކަން ގާއިމްކޮށްދިނުމަށް އެ ސިޓީ ކައުންސިލުން ގޮވާލައިފިއެވެ.
ފޭދޫގައި މިދިޔަ ބުދަ ދުވަހުގެ ރޭ ހިންގި މާރާމާރީއެއްގައި އެ އަވަށުގެ 21 އަހަރުގެ ޒުވާނަކު ވަނީ މަރުވެފައެވެ.
އެކަމާ ގުޅިގެން އައްޑޫ ސިޓީ ކައުންސިލުން ނެރުނު ބަޔާނެއްގައި ބުނީ، އެ ސިޓީގައި ފަހަކަށް އައިސް މާރާމާރީ އިތުރުވެ ރަށުތެރޭގައި ބިރުވެރިކަން އުފެދި، އެކި ފަރާތްތަކަށް ސީރިއަސް އަނިޔާ ލިބި، ޒުވާނެއްގެ ފުރާނަ ގޮސްފައިވާ މައްސަލަ އާ ގުޅިގެން ކަންބޮޑުވާ ކަމަށެވެ.
މާރާމާރީ އާއި މީހުންނަށް އަނިޔާ ދިނުމުގެ އެއްވެސް އަމަލަކީ އެ ކައުންސިލުން އެއްގޮތަކަށްވެސް ބަލައިގަންނާނެ ކަމެއް ނޫންކަމާށާއި މިފަދަ އަމަލުތައް އައްޑޫސިޓީ ކައުންސިލުން ހަރުކަށި އިބާރާތުން ކުށްވެރިކުރާ ކަމަށް ވެސް ކައުންސިލުން ވަނީ ބުނެފައެވެ.
އެބަޔާނުގައި ވަނީ މި މައްސަލައަކީ މުޖްތަމައުގެ އަމަންއަމާންކަމާއި ސަލާމަތާއި ގުޅިފައިވާ ނުރައްކާތެރި މައްސަލައަކަށް ވުމުން، މި މައްސަލައިގައި ކުށްވެރިވާ ފަރާތްތަކަށް ގާނޫނުގައި ކަނޑައެޅިފައިވާ އެންމެ ހަރުކަށި އަދަބު ދިނުމަށް ގޮވާލާފައެވެ.
ހަމައެހެންމެ ރަށުތެރޭގައި އަމާންކަން ގާއިމްކޮށްދެއްވުން އަވަސްކޮށްދިނުމަށް ދައުލަތުގެ މުވައްސަސާތަކާއި ކަމާއިބެހޭ އެންމެހާ އިދާރާތަކަށް ވަނީ ގޮވާލާފައެވެ.
މީގެ އިތުރުން މިދިޔަ އަންގާރަ ދުވަހުގެ ރޭ ވެސް ވަނީ މާރާމާރީއެއްގައި ހިންގާއެވެ. އެ މާރާމާރީގައި 19 އަހަރުގެ ޒުވާނަކު ވަނީ ޒަހަމްކޮށްފައެވެ.
