ޅ. ނައިފަރުން އެ އަތޮޅުގެ ހިންނަވަރަށް މުދާ ބާލަން ނައިފަރުން ނުކުންނަނިކޮށް، ކަނޑު ދަތުރު ކުރާ ބޯޓެއް ނައިފަރުގެ ކަނޑުތޮށީގައި ޖެހި، ފަޅައިގެން ގޮސް ދިޔަވެއްޖެއެވެ.
ދިޔަވެގެން ރިޕޯޓްކޮށްފައި ވަނީ ކުޅުދުއްފުށްޓާއި މާލެ އާ ދެމެދު ދަތުރުކުރާ "ދޮށި" ނަމަކަށް ކިޔާ ބޯޓެއް ކަމަށް އެމްއެންޑީއެފުން ބުންޏެވެ. އެމްއެންޑީއެފުން ބުނި ގޮތުގައި، އެމްއެންޑީއެފްގެ އުތުރު އޭރިއާ ކޮމާންޑާއި ނައިފަރު ފަޔާ އެންޑް ރެސްކިއުގެ ސިފައިން ހަރަކާތްތެރިވަމުން ގޮސްފައިވެއެވެ.
ނައިފަރުގެ ކަނޑުތޮށީގައި ޖެހި، އެ ހާދިސާ ހިނގި ވަގުތަކީ ރާއްޖެއަށް މިހާރު ކުރަމުންދާ މޫސުމީ ވިއްސާރައިގެ ސަބަބުން، އެ ރަށަށް ވައި ގަދަވެފައިވާ ވަގުތެކެވެ. އޭރު އެ ބޯޓުގެ މިސްރާބު ހުރީ ނައިފަރުން ނުކުމެ، ހިންނަވަރަށް ގޮސް އެ ރަށަށް މުދާ ބޭލުމަށް ކަމަށް، ނައިފަރު ކައުންސިލްގެ ރައީސް މުހައްމަދު ރަޝީދު "ދަ ޕްރެސް" އަށް ވިދާޅުވިއެވެ.
އޭނާ ވިދާޅުވި ގޮތުގައި، ކައުންސިލަށް އެ ހާދިސާގެ މައުލޫމާތު ލިބިފައިވަނީ ރޭ 7:30 ހާއިރެވެ. އެހެންވެ އެ ބޯޓު ނައިފަރުގެ ބަނދަރަށް ކައިރިކޮށް، ބޯޓުގެ ދިޔަގަނޑު ހިއްކައި، އެ ބޯޓުގެ ބާގަނޑު ބައްދައި ވަގުތީ ހައްލެއް ހޯދާފައިވާ ކަމަށްވެސް ވިދާޅުވިއެވެ. އެ ހާދިސާ ހިނގިއިރު ނައިފަރުގެ ރައްޔިތުންނާއި، ފުލުހުންނާއި ސިފައިންގެ އެހީތެރިކަން ލިބުނުކަން މުހައްމަދު ރަޝީދު ފާހަގަ ކުރެއްވިއެވެ.
އެ ހާދިސާ ހިނގިއިރު، ދޮށި ބޯޓުގައި އަންހެނަކާއި 29 ފިރިހެނުން ދިޔައީ ދަތުރު ކުރަމުންނެވެ. އެއްވެސް މީހަކަށް ގެއްލުމެއް ލިބިފައި ނުވާއިރު، އެ ބޯޓުގައި ހުރި އެއްވެސް މުދަލަކަށް ވެސް ގެއްލުމެއް ނުލިބޭ ކަމަށް އޭނާ ވިދާޅުވިއެވެ.
އެ ހާދިސާގެ އިތުރު ތަފްސީލެއް އެމްއެންޑީއެފުން ނުދެއެވެ. އަދި އެ ބޯޓުން ވެސް ފޯނަށް ޖަވާބުދީފައި ނުވާތީ ބޯޓުގެ ބަހެއް ލިބޭގޮތް ވަނީ ނުވެފައެވެ.
މި ދުވަސްވަރު ދިމާވަނީ ހުޅަނގު މޫސުމާ ކަމަށް ވާތީ، ކަނޑުތައް ގަދަވެ، ވައި ގަދަވާނެތީވެ، ކަނޑުގެ މަގުން ދަތުރު ކުރާ ފަރާތްތަކުން މޫސުމަށް ސަމާލުކަމެއް ދިނުމަށް މެޓް އޮފީހުންނާއި ކޯސްޓްގާޑުން އިލްތިމާސް ކުރެއެވެ.
