މާލެ ސަރަހައްދުގެ އެއްގަމު ދަތުރު ފަތުރުގެ ހިދުމަތް ފުޅާކޮށް ކުރުމަށްޓަކައި އިތުރު ބަސްތަކެއް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ގެނެސްފިއެވެ.
އެ ބަސްތައް ރޭގެ ވަގުތެއްގައި ގެނެސްފައިވާކަން ހާމަކުރައްވާ އެމްޓީސީސީ ގެ ސީއީއޯ އާދަމް އާޒިމް ވިދާޅުވީ ހުޅުމާލެ ފޭސް 2 ގެ ހިޔާ ފްލެޓުތަކުގައި ދިރިއުޅޭ ރައްޔިތުންނަށް ދިމާވެފައިވާ ދަތުރު ފަތުރުގެ ދަތިކަމަށް ރައީސް އިބްރާހިމް މުހައްމަދު ސޯލިހު ގެ އިރުޝާދުގެ ދަށުން ދާއިމީ ހައްލެއް ހޯދާ ދިނުމަށް ބޭނުންވާ ބަސްތައް މާލެ ޕޯޓަށް ބާލައިފި ކަމަށެވެ.
މީގެ އިތުރުން މި ބަސްތަކުގެ ދަތުރުތައް އަންނަ ޖޫން މަހުގެ ތެރޭގައި ފެށޭނެ ކަމަށްވެސް އާޒިމް ވަނީ ބުނެފައެވެ.
ހުޅުމާލެ ދެވަނަ ފިޔަވަހީގައި އަޅާފައި ހުރި ހިޔާ ފްލެޓްތަކުގައި ގިނަ ބަޔަކު އާބާދުވެ ދިރިއުޅެމުން އަންނަ އިރު، އެ ސަރަހައްދުން މާލެއަށް ދަތުރުކުރުމުގައި ދަތިތައް ހުރިކަމުގެ ކަންބޮޑުވުންތަކަަށް އަންނަނީ ހައްލު ހޯދައިދެމުންނެވެ.
މިހާރުވެސް މާލެ، ހުޅުޅެ އަދި ހުޅުމާލެ އަށް އެމްޓީސީސީން ބަހުގެ ހިދުމަތް ދެއެވެ.
