މަސްތުވާތަކެތީގެ ވިޔަފާރިކުރާ ބައެއް އުޅޭ ކަމުގެ ތުހުމަތުގައި ކޯޓު އަމުރުގެ ދަށުން ހިޔާ ފްލެޓެއް ފާސްކުރުމަށް ފަހު، ބައި ލައްކަ ރުފިޔާ އާއި ގިނަ އަދަދެއްގެ މަސްތުވާތަކެތި ފެނުމުން ފަސް މީހަކު ހައްޔަރުކޮށްފިއެވެ.
އެ މައްސަލާގައި ހައްޔަރުކޮށްފައި ވަނީ އުމުރުން 19 އަހަރާއި 26 އަހަރާ ދެމެދުގެ މީހުންނެވެ. އެ މީހުންގެ މައްޗަށް ކޮށްފައިވަނީ މަސްތުވާތަކެތި ގެންގުޅެ، ބޭނުންކޮށް، އެ ތަކެތިން ވިޔަފާރިކުރާ ކަމުގެ ތުހުމަތެވެ. ކްރިމިނަލް ކޯޓުން ވަނީ އެ ފަސް މީހުންގެ މައްޗަށް 15 ދުވަހުގެ ބަންދެއް ޖަހާފައެވެ.
ފުލުހުން ކޯޓަށް ހުށަހެޅި ހެކީގައި ބުނެފައިވަނީ އެ ފްލެޓުން 50،300ރ އާ އެކު މަސްތުވާތަކެތި ބަންދުކުރުމަށް ބޭނުންކުރާ ބައެއް އާލާތްތައްވެސް ފެނިފައިވާ ކަމަށާއި، އެ ތަނުގެ ސިޓިންރޫމްގައި ހުރި ޓީވީ ރެކުގެ ދަމާ ވަތްގަނޑުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ބަންދުކޮށްފައިވާ ހަ ރަބަރު ޕެކެޓު ފެނިފައިވާ ކަމަށެވެ.
ހައްޔަރުކުރި މީހުންގެ ތެރެއިން އެކަކު ބުނި ގޮތުގައި އެ ފައިސާ އަކީ އޭނާ ވަޒީފާ އަދާކުރާ ތަނުން ލިބުނު ފައިސާ ކަމަށާއި، އޭނާ ހައްޔަރުކުރި ތަނުގައި މަސްތުވާތަކެތި ބޭނުންކޮށްފައި ހުއްޓަސް އެފަދަ މުއާމަލާތެއް ކޮށްފައި ނުވާނެ ކަމަށެވެ.
އެ މައްސަލާގައި ހައްޔަރުކުރި މީހުންގެ ތެރޭގައި ކުރިން ފަރުވާ ހޯދައި ފުރިހަމަކޮށްފައިވާ މީހަކު ހިމެނޭއިރު، އެތަނުން އެކަކު ވަނީ އެ ފްލެޓަށް ދިޔައީ މަސްތުވާތަކެތި ބޭނުންކުރަން ކަމަށް އެއްބަސްވެފައެވެ. އަދި ފަރުވާއަށް ފޮނުވައިދިނުމަށް އޭނާ ވަނީ ކޯޓުގައި އެދިފައެވެ.
އެފަދަމީހުން އަތުން ފުލެޓް އަތުލައި އެތަނުން ބޭރުކުރޭ