ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް އިތުރުވުމުގެ ސަބަބުން ލޮކްޑައުންގެ ހަރުކަށި އަމުރެއް ތަންފީޒު ކުރަމުން ދާ ޗައިނާގެ ވިޔަފާރި މަރުކަޒު، ޝަންހާއީގައި އާންމުންގެ ހަރަކާތްތެރިވުން ކޮންޓްރޯލް ކުރުމުގެ ގޮތުން، މަގުތަކުގައި ތޭރި ޖަހަން ފަށައިފިއެވެ.
އެގޮތުން ޗައިނާގެ ކަމާ ބެހޭ ފަރާތްތަކުން ވަނީ، ގެއިން ބޭރަށް ނިކުމެ އުޅުން މަނާ ކޮށްފައި ވާ މީހުން ދިރިއުޅެމުން ދާ އިމާރާތްތަކުގެ ބޭރުގައި، އިންޒާރު ކުރުމަކާ ނުލައި، ފެހި ކުލައިގެ އުސް ތޭރިތަކެއް ޖަހާފައެވެ. ތަޅުލާފައިވާ ބައެއް އިމާރާތްތަކުގެ ބޭރުގައިވެސް އަންގާލުމެއް ނެތި ފެންސް ޖަހާފައި ވާ ކަމަށް މައުލޫމާތު ލިބެއެވެ.
ޝަންހާއީގެ ތާރީހު ދެކެފައި ނުވާ ދަރަޖައަކަށް އެ ސަރަހައްދުގައި ކޮވިޑް ފެތުރެމުން ދިއުމާ ގުޅިގެން ކަމާ ބެހޭ ފަރާތްތަކުން އެ ސަރަހައްދު ލޮކްޑައުން ކުރިތާ މިހާރު 5 ވަރަކަށް ހަފުތާ ވެފައި ވާއިރު، އެ ސިޓީގެ 25 މިލިއަނެއްހާ މީހުން ވަނީ ގެތަކުގައި ބަންދު ވެފައެވެ.
ސޯޝަލް މީޑިއާގައި ދައުރުވަމުންދާ މަންޒަރުތަކަށް ބަލާއިރު، ހުދުކުލައިގެ ހެޒްމެޓް ސޫޓުތަކުގައި ތިބި ބަޔަކު، އިމާރާތްތަކުގެ ދޮރުމަތީގައާއި މަގުތަކުގައި ތޭރި ޖަހާ ބައްދާތަން ވަނީ ފެނިފައެވެ. 1 މީހަކު ޕޮޒިޓިވް ވެފައިވާ އިމާރާތްތަކުގެ ބޭރުގައިވެސް ތޭރި ޖަހާފައި ވާ އިރު، ތޭރިތަކުގެ އުސް މިނުގައި 2 މީޓަރު ހުންނާނެ ކަމަށް މައުލޫމާތު ލިބެއެވެ.
މިފަދަ ގޮތަކަށް ޗައިނާގެ އޮފިޝަލުން ތޭރި ޖަހަމުން ދާ ސަބަބެއް އަދި ސާފެއް ނުވެއެވެ. ނަމަވެސް އޭޕްރިލް 23 ވަނަ ދުވަހު، ސަރަހައްދީ އިދާރާއިން އާންމު ކުރި އިއުލާނެއްގައި، ކަރަންޓީންގެ ހަރުކަށި އަމުރު ތަންފީޒު ކުރާނެ ކަމުގެ އިންޒާރު ދީފައި ވާ ކަން ފާހަގަ ކުރަން ޖެހެއެވެ.
ޝަންހާއީ ލޮކްޑައުން ކުރުމުގެ ނަމުގައި ޗައިނާގެ ކަމާ ބެހޭ ފަރާތްތަކުން ތަންފީޒު ކުރަމުންދާ ހަރުކަށި ފިޔަވަޅުތަކާއެކު އާންމު ދިރިއުޅުމާއި ޒަރޫރީ ބޭނުންތަކަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. މިފަދަ ވާހަކަތައް ސޯޝަލް މީޑިއާގައި ހިއްސާ ކުރަމުން ދާ އިރު، ޗައިނާއިން ދަނީ އެފަދަ މައުލޫމާތު ސެންސަރު ކުރުމުގެ މަސައްކަތްވެސް ކުރަމުން ކަމަށް ހަބަރު ލިބެއެވެ.
ޗައިނާއަކީ 2019 ވަނަ އަހަރުގެ ފަހު ކޮޅު، އެންމެ ފުރަތަމަ ކޮވިޑް ކޭސްތައް ރިޕޯޓް ކުރަން ފެށި ގައުމަށް ވާ އިރު، އެދުވަސްވަރުވެސް ޗައިނާއިން ކަންތައްތަކެއް ފޮރުވި ކަމުގެ ތުހުމަތު ވަނީ ފެންމަތިވެފައެވެ.
