މާވަށު ދާއިރާގެ މެންބަރު އަދި ޕީއެންސީގެ ނައިބު ރައީސް މުހައްމަދު ސައީދު އާއި ގުރައިދޫ ދާއިރާގެ މެންބަރު އަދި ޕީޕީއެމްގެ ނައިބު ރައީސް ޣައްސާން މައުމޫން މިރޭ ފުލުހަށް ހާޒިރު ކުރަން އަންގާފައިވާ ކަމަށް އިދިކޮޅު ޕީޕީއެމުން ބުނެފިއެވެ.
ޕީޕީއެމުން ބުނީ، އެ ދެ ބޭފުޅުން ފުލުހަށް ހާޒިރު ކުރަން އަންގާފައި ވަނީ "ނޭވާހޮޅިއަށް"ގެ ނަމުގައި އެ ކޯލިޝަނުން މިދިޔަ މަހުގެ 25 ވަނަ ދުވަހު ކުރިއަށް ގެންދިޔަ މުޒާހަރާއާ ގުޅިގެން ކަމަށެވެ. އެގޮތުން މިރޭ ސައީދު ފުލުހަށް ހާޒިރު ވާން އަންގާފައި ވަނީ 9:30 އަށް ކަމަށާއި ޣައްސާން ފުލުހަށް ހާޒިރުވާން އަންގާފައި ވަނީ މިރޭ 10:30 ގައި ކަމަށް ޕީޕީއެމުން ބުނެއެވެ.
އެ މުޒާހަރާއާ ގުޅިގެން 11 މީހަކު ހައްޔަރު ކުރި އިރު އޭގެތެރޭގައި ޣައްސާނާއި ސައީދު ހިމެނެއެވެ. މީގެ އިތުރުން ވެސް އެ މުޒާހަރާގައި ހައްޔަރު ކުރި މީހުންގެ ތެރޭގައި މާލެ ސިޓީ ކައުންސިލްގެ ޑެޕިއުޓީ މޭޔަރު އަދި ޕީއެންސީގެ ކައުންސިލް މެންބަރު އަހްމަދު ނަރީޝާއި، ހޯރަފުށި ދާއިރާގެ ކުރީގެ މެންބަރު މުހައްމަދު އިސްމާއީލާއި، ކުރީގެ ކާނަލް އަހްމަދު ފަޔާޒް އަލީ ހިމެނެއެވެ.
އިންޑިއާ އައުޓްގެ ކެމްޕެއިންގެ ދަށުން ޕީޕީއެމް އާއި ޕީއެންސީ ގުޅިގެން މި މުޒާހަރާ ކުރިއަށް ގެންގޮސްފައިވާ އިރު، އެ މުޒާހަރާ ކުރިއަށް ނުގެންދިއުމަށް ފުލުހުން ވަނީ އިލްތިމާސްކޮށްފައެވެ. އެއީ އެ އެއްވުމަކީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ އެއްގޮތަށް ބާއްވާ އެއްވުމެއް ކަމަށް ނުބެލެވޭތީ ކަމަށް ބުނެ ފުލުހުން ވަނީ އެ އެއްވުމުގައި ބައިވެރިވެއްޖެ ނަމަ ފިޔަވަޅު އަޅާނެ ކަމަށް ބުނެފައެވެ..
