ރަށް ގިރުމުގެ މައްސަލަ ހައްކުރުމަށް ހއ. ހޯރަފުއްޓާއި އެއާޕޯޓާ ވަކިކުރަން ނިންމައިފިއެވެ.
ހޯރަފުށީ އެއާޕޯޓް އެޅުމަށް ހިއްކި ސަރަޙައްދާއި ހޯރަފުށި ގުޅާލާފައިވުމުގެ ސަބަބުން ހޯރަފުއްޓާއި އެއާޕޯޓް ހިމެނޭ ސަރަހައްދު ގިރުމުގެ މައްސަލަ އަންނަނީ ކުރިމަތިވަމުންނެވެ.
މި މައްސަލަ ހައްލުކުރުމަށް އެއާޕޯޓާއި ހޯރަފުށީ މަގުން ވަކިކޮށްލައި ދޭތެރޭގައި ކޯޒްވޭއެއް ހެދުމަށް މިހާރު ވަނީ ނިންމާފައެވެ.
މި މަސައްކަތްއެމްޓީސީސީއާ ހަވާލުކޮށްފައިވާއިރު އެ ކުންފުނީގެ ސީއީއޯ އާދަމް އާޒިމް ވިދާޅުވީ މިހާރު ކުރަމުން އަންނަނީ އެ މަސައްކަތުގެ ޑިޒައިނިން މަސައްކަތް ކަމަށެވެ. އަދި މަހެއްގެ ތެރޭގައި ޑިޒައިނިން މަސައްކަތް ނިމި، އޭގެ އަމަލީ ޖޫން ހިސާބުގައި ފެށޭނެ ކަމަށް ވެސް އާޒިމް ވިދާޅުވިއެވެ.
ހޯރަފުށީ އެއާޕޯޓްގެ ރަންވޭގެ ގޮނޑުދޮށް ހިމާޔަތްކުރުމުގެ މަސައްކަތް އެމްޓީސީސީން ފަށާފައިވަނީ މިދިޔަ އަހަރުގެ ޖުލައި މަހުގެ ތެރޭގައެވެ.
360 ދުވަހުގެ ތެރޭގައި ނިންމަން ހަވާލުކުރި މި މަޝްރޫއަކީ 90.5 މިލިއަން ރުފިޔާގެ މަޝްރޫއެކެވެ.
ހޯރަފުށީ އެއާޕޯޓް ތަރައްގީ ކުރުމުގެ މަޝްރޫއުގެ މަސައްކަތް ނިންމާ ސަރުކާރާ ހަވާލުކުރެވުނީ ނޮވެމްބަރު 6، 2020 ވަނަ ދުވަހުއެވެ.
