ކުރިއަށް އޮތް ރޯދަ މަހު އެމްޓީސީސީގެ ބަހުގެ ހިދުމަތްދޭ ގަޑިތައް އާންމުކޮށްފިއެވެ.
އެމްޓީސީސީން އާންމުކޮށްފައިވާ ޝެޑިއުލްގައި ވާގޮތުން ރޯދަ މަހު ބަހުގެ ދަތުރުތައް ފަށަނީ ހެނދުނު 6 ގައެވެ.
އާދިއްތަ ދުވަހުން ބުރާސްފަތި ދުވަހުގެ ނިޔަލަށް ހަވީރު 5:15 ވަންދެން ބަހުގެ ހިދުމަތް ދޭއިރު ބްރޭކަކަށް ފަހު އަލުން މިދުވަސްތަކުގައި ހިދުމަތް ފަށާނީ ރޭގަނޑު 7 ޖަހާއިރުއެވެ.
ހުކުރު ދުވަހު ހެނދުނު 10:30 އިން މެންދުރު 1:30 އަށް އަދި ހަވީރު 5:15 އިން ރޭގަނޑު 7 އަށް ބަހުގެ ހިދުމަތް މެދުކެނޑޭނެއެވެ. ނަމަވެސް ހުކުރު ދުވަހުގެ 1:30 އިން ހަވީރު 5:15 އަށް ޝެޑިއުލް ބަސްތައް ދުއްވާނެއެވެ.
ކޮންމެ ދުވަހަކުވެސް ބަހުގެ ހިދުމަތް މެދުކަނޑާލަނީ ރޭގަނޑު 11 ޖަހާއިރު ކަމަށް ޝެޑިއުލްއިން ދައްކައެވެ.
ކޮންމެ ދުވަހަކު ހެނދުނު ބަހުގެ ހިދުމަތްތައް ފަށާނީ ކާނިވަލް ބަސް ސްޓޮޕުންނެވެ. އަދި ރޭގަނޑު 7 ގެ ފަށުން ދަތުރުތައް ފަށާނީ ހުޅުމާލެ ރެޑްވޭވް ބަސް ސްޓޮޕުންނެވެ.
ރޯދަ މަހާ ގުޅިގެން ގިނަ އިދާރާތަކުން ހިދުމަތްތައްދޭ ގަޑިތައް ވަނީ ބަނދަލު ކޮށްފައެވެ. އާންމު އޮފީސްތައް ފަށާނީ ހެނދުނު 9 ޖަހާއިރުއެވެ. ސިވިލް ސާވިސްއަށް މިފަހަރު މަސައްކަތު ވަގުތު އޮތީ، ހެނދުނު 9 އިން މެންދުރު ފަހު 1 އަށެވެ. ރޯދަ މަހު ބޭންކްތައް ހުޅުވާނީ ހެނދުނު 9:30 އިން މެންދުރު 12 އަށެވެ.
މި އަހަރުގެ ކަލަންޑަރުގައިވާ ގޮތުން ރޯދަ މަހުގެ ފުރަތަމަ ދުވަހަކީ އަންނަ ހޮނިހިރު ދުވަހެވެ.
