މި އަހަރުގެ ރޯދަ މަހުގެ އިނާޔަތްތައް ރޯދަ އިނާޔަތް ނުލިބޭ މުވައްޒަފުންނަށް މިއަދުގެ ނިޔަލަށް ރޯދަ އިނާޔަތް ލިބޭނެ ކަމަށް ފިނޭންސް މިނިސްޓްރީން ބުނެފިއެވެ.
މިދިޔަ ހޯމަ ދުވަހުގެ ނިޔަލަށް ރޯދަ އިނާޔަތް ދިނުމަށް މިނިސްޓްރީން އެނގި ނަމަވެސް ގިނަ މިނިސްޓްރީތަކާއި ހޮސްޕިޓަލްތަކުގެ މުވައްޒަފުންނަށް އެލަވެންސް ލިބިފައެއް ނުވާތީ ވަނީ ކަންބޮޑުވުން ފާޅުކޮށްފައެވެ.
އެކަމާ ގުޅިގެން "ދަ ޕްރެސް" އަށް މައުލޫމާތު ދެއްވަމުން ފިނޭންސް މިނިސްޓްރީގެ މީޑިއާ އޮފިޝަލް މުހައްމަދު ޝަނޫން ވިދާޅުވީ ފިނޭންސް މިނިސްޓްރީއަށް ޝީޓްތައް ފޮނުވާ ވަރަކުން ޖަމާ ކޮށްދެމުން އަންނަ ކަމަށެވެ.
މިގޮތުން މިއަދުގެ ނިޔަލަށް ސަރުކާރުގެ ހުރިހާ އޮފީސްތަކުގެ މުވައްޒަފުންނަށް ރޯދަ އިނާޔަތް ދޭނެ ކަމަށް ޝަނޫން ވިދާޅުވިއެވެ.
މިނިސްޓްރީން މިމަހު 23 ވަނަ ދުވަހު ނެރުނު މާލީ ސާކިއުލާއެއްގައިވާ ގޮތުން، ކޮންމެ މުސްލިމް މުވައްޒަފަކަށް ރޯދަ މަހުގެ އިނާޔަތުގެ ގޮތުގައި 3،000ރ ދިނުމަށާއި، އެއް ވަޒީފާއަށް ވުރެ ގިނަ ވަޒީފާ އަދާކުރާ ނަމަ، އަސާސީ ވަޒީފާ އަދާކުރާ ތަނުން އެކަނި، އެ މުވައްޒަފަކަށް އިނާޔަތް ދޭންޖެހެއެވެ.
ނަމަވެސް، ރޯދަ މަހު ޕޭ ލީވްގައި މަސައްކަތްކުރާ ސަރުކާރު މުވައްޒަފުންނާއި، ނޯޕޭ ލީވްގައި ތިބޭ މުވައްޒަފުންނަށް ރޯދަ އިނާޔަތް ދޭން ނުޖެހޭނެ ކަމަށް އެ ސާކިއުލާގައި ބަޔާންކޮށްފައިވާއިރު، ޗުއްޓީ ނިންމާފައި ރޯދަމަހު ވަޒީފާއަށް ނުކުންނަން ފަށައިފި ނަމަ، އެ ދުވަހަކުން ފެށިގެން ރޯދަ މަސް ނިމެންދެން ޖެހޭ އަދަދު ބަލައި، ރޯދަ އިނާޔަތް ދިނުމަށް ވަނީ އަންގާފައެވެ.
ހަމަ އެއާއެކު، އިނާޔަތް ދީފައި ވަނިކޮށް އެއްވެސް މުވައްޒަފަކު ވަޒީފާއިން ވަކިވެއްޖެނަމަ، އެ މުވައްޒަފަކު ވަކިވި ދުވަހުން ފެށިގެން ބާކީ ދުވަސްތަކަށް ޖެހޭ ފައިސާގެ އަދަދު އެ މުވައްޒަފެއްގެ އަތުން އަނބުރާ ހޯދުމަށްވެސް އަންގާފައިވެއެވެ.
އަދި ދައުލަތުގެ އެކައުންޓިން ސޮފްޓްވެއާ ބޭނުންކުރާ އޮފީސްތަކުން މާދަމާ ރޯދަ އިނާޔަތުގެ ވައުޗަރުތައް އިދާރާތަކަށް ފޮނުވަންވެސް ވަނީ އަންގާފައެވެ.
