އިންޑިއާގެ ހިލޭ އެހީގެ ދަށުން އައްޑޫ ސިޓީގައި އިމާރާތްކޮށްފައިވާ ޕޮލިސް އެކަޑަމީ ހުޅުވައި، އިތުރު ދެ އެއްބަސްވުމެއްގައި ސޮއިކުރުމަށްޓަކައި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު އައްޑުއަށް ވަޑައިގަންނަވަން ހަމަޖެހިއްޖެއެވެ.
ފޮރިން މިނިސްޓްރީން ބުނީ، އިންޑިއާގެ އެކްސްޓާނަލް އެފެއާޒް މިނިސްޓަރު އައްޑުއަށް ރަސްމީ ދަތުރުފުޅެއްގައި މިރޭ ވަޑައިގަންނަވަނީ އދ ގެ އާންމު މަޖިލީހުގެ ރައީސް އަދި ފޮރިން މިނިސްޓަރު އަބްދުﷲ ޝާހިދުގެ ދައުވަތަކަށް ދެ ދުވަހަށް ކަމަށެވެ. އެގޮތުން މިރޭ 7:15 ގައި ޑރ. ޖައިޝަންކަރު ވަޑައިގަންނަވާނެ ކަމަށް އެ މިނިސްޓްރީން ބުންޏެވެ.
އެ ބުނި ގޮތުގައި، ޑރ. ޖައިޝަންކަރުގެ އެ ދަތުރުފުޅުގައި ރާއްޖެއާއި އިންޑިއާ އާއި ދެމެދު ރަސްމީ ވާހަކަތައް ބާއްވަވައި، ޖޮއިންޓް ޕްރެސް ކޮންފަރެންސެއް، ޝާހިދާއި ޑރ. ޖައިޝަންކަރު ދެއްވާނެއެވެ.
އޭގެ އިތުރުން، ޑރ. ޖައިޝަންކަރުގެ ދަތުރުފުޅުގައި ރައީސް އިބްރާހީމް މުހައްމަދު ސޯލިހުގެ އަރިހަށް އިހްތިރާމުގެ ޒިޔާރަތެއް ކުރައްވާނެ ކަމަށްވެސް ފޮރިން މިނިސްޓްރީން ބުންޏެވެ. ރާއްޖޭގެ އެންމެ ދެކުނަށް ކުރައްވާ ހަތަރު ދުވަހުގެ ރަސްމީ ދަތުރުފުޅުގައި ރައީސް މިއަދުގެ ވަގުތެއްގައި އައްޑުއަށް ވަޑައިގަންނަވާނެއެވެ.
ރަސްމީ ވާހަކަތަކަށް ފަހު، މާދަމާ ޕޮލިސް އެކަޑަމީ ހުޅުވުމާއި، އައްޑޫގެ އެކި އަވަށްތަކުގެ ބަނދަރު ހުޅުއްވައި ދެއްވުމުގެ އިތުރުން މަގު ހެދުމުގެ މަޝްރޫއުވެސް ރަސްމީކޮށް ފަށްޓަވައި، އައްޑޫގެ ބިން ހިއްކުމުގެ މަޝްރޫއެއްގައި ސޮއިކުރުމަށްވެސް ހަމަޖެހިފައިވެއެވެ.
އެއަށްފަހު، މާދަމާގެ ވަގުތެއްގައި އިންޑިއާގެ އެކްސްޓާނަލް އެފެއާޒް މިނިސްޓަރު ފުރާ ވަޑައިގަތުމަށް ވަނީ ހަމަޖެހިފައެވެ.
