ބީއެމްއެލްގެ މުވައްޒަފުން އިސްނަގައިގެން މާލެ ސުވިމިން ޓްރެކް އަދި ހުޅުމާލެ ފޭސް 2 ބީޗް ސަރަހައްދު ސާފުކޮށްފިއެވެ.
ބީއެމްއެލް އިން ބުނީ، މި ހަރަކާތަކީ ބީއެމްއެލްގެ މުވައްޒަފުން އިސްނަގައިގެން މާޗު މަހުގެ 20 ވަނަ ދުވަހު ދުނިޔޭގައި ފާހަގަ ކުރަމުން އަންނަ އިންޓާނޭޝަނަލް ޑޭ އޮފް ހެޕިނަސްއާ ގުޅުވައިގެން ކުރިޔަށް ގެންދިޔަ ހަރަކާތެއް ކަމަށެވެ.
މި ހަރަކާތް ކުރިއަށް ގެންގޮސްފައިވަނީ މިއަދު ހެނދުނު 6:00 އިން ފެށިގެން 9:00 އަށް ކަމަށް ބީއެމްއެލް އިން ބުނެއެވެ.
ބީއެމްއެލްއިން ބުނީ މިއީ ސުވިމިން އެސޯސިއޭޝަން އޮފް މޯލްޑިވްސް، ޑައިވް ކްލަބް މޯލްޑިވްސް، ޑައިވް ޑެސްކް އަދި ޕާރލޭއާ ގުޅިގެން ހިންގި ހަރަކާތެއް ކަމަށެވެ.
ބީއެމްއެލް އިން ބުނީ، މި ދެ ސަރަހައްދުން 755 ކިލޯގެ ކުނި ނަގާފައިވާ ކަމަށެވެ. މީގެ ތެރެއިން 84 ކިލޯގެ ޕްލާސްޓިކް ރީސައިކަލް ކުރުމަށް ފާލޭއާ ހަވާލުކޮށްފައިވާ ކަމަށް ބީއެމްއެލް އިން ބުނެއެވެ.
މި ހަރަކާތުގައި ބީއެމްއެލް ގެ 80 އަށްވުރެ ގިނަ މުވައްޒަފުން ބައިވެރިވެފައިވާ ކަމަށް ބީއެމްއެލްއިން ބުނެއެވެ.
ބީއެމްއެލްއިން ބުނީ މިދިޔަ އަހަރުވެސް އަތޮޅުތެރޭަގައި މަސައްކަތް ކުރާ މުވައްޒަފުން މިދުވަހާ ގުޅުވައިގެން ވ. ފެލިދޫ، ލ. ފޮނަދޫ އަދި ހދ. ކުޅުދުއްފުށީގައި ހަރަކާތްތަކެއް ހިންގާފައިވާ ކަމަށެވެ.
