ކޮމިއުނިޓީ ފަންޑުގެ ދަށުން ހއ. މޮޅަދޫ ކުޅީގައި އީކޯ ޕާކެއް ގާއިމްކޮށްފިއެވެ.
ބީއެމްއެލް އިން ބުނީ މިއީ ރަށުގެ ކުޅީގެ ގުދުރަތީ ރީތިކަން އާންމުންނަށް ފަސޭހައިން ބަލާލައި ހިތްހަމަޖައްސާލާނެ މާހައުލެއް ގާއިމްކޮށްދިނުމާއެކު ކުޅީގެ ގުދުރަތީ ރީތިކަން އަންނަންއޮތް ޖީލުތަކާ ހަމަޔަށް ދަމަހައްޓާ އެތަނުގެ މައުލޫމާތު ޒިޔާރަތްކުރާ މީހުންނާއި ހާއްސާކޮށް ރަށުގައި ފަތުރުވެރިކަން ފުޅާކުރުމުގެ މަގްސަދުގައި ހިންގުނު ޕްރޮޖެކްޓެއް ކަމަށެވެ.
މި ޕްރޮޖެކްޓްގެ ދަށުން އެ ކުޅީގައި ވިއުވިން ޕްލެޓްފޯމެއް ތަރައްގީކޮށްއިވާ ކަމަށް ބީއެމްއެލް އިން ބުނެއެވެ. އަދި ކުޅި ހިމެނޭ ސަރަހައްދުގައި ބެންޗުބަހައްޓައި، ޖޯލިފަތި، އުނދޯލި އަދި ޑަސްބިން ބަހައްޓައި ސޯލާ ބައްތި ވެސް ހަރުކޮށްފައިވާ ކަމަށް ބީއެމްއެލް އިން ވަނީ ބުނެފައެވެ.
ކޮމިއުނިޓީ ފަންޑަކީ އާންމު ފަރުދުންނާއި ޖަމިއްޔާތަކުން މުޖުތަމައަށް ފައިދާކުރާނެ ޕްރޮޖެކްޓް ހިންގުމަށް އެހީތެރިވުމުގެ ގޮތުން ބީއެމްއެލް އިް ތައާރަފްކުރި ފަންޑެކެވެ.
މި ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކަށާއި، ތައުލީމާއި، ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ.
މިހާރު ބީއެމްއެލްއިން ދަނީ މިއަހަރުގެ ފުރަތަމަ ކުއާޓާ އަށް ހުށަހެޅި ޕްރޮޕޯސަލްތައް އިވެލުއޭޓް ކުރުމުގެ މަސައްކަތްކުރަމުން ކަމަށް އެ ބޭންކުން ބުނެއެވެ.
