މަކަރާއި ހީލަތުން ފައިސާ ހޯދުމުގެ މައްސަލަ އިތުރުވަމުންދާތީ އެކަމަށް ސަމާލުވުމަށް ބީއެމްއެލް އިން އިލްތިމާސް ކޮށްފިއެވެ.
ބީއެމްއެލް އިން ބުނީ ރާއްޖޭގައި އޮޅުވާލައިގެން ފައިސާގެ މުއާމަލާތްތައް ހިންގުން ވަރަށް ބޮޑަށް އިތުރުވެފައިވާ އިރު. މަކަރާއި ހީލަތުން މީހުންގެ އަތުން އެކި އަދަދުން ފައިސާ ހޯދާ މިފަދަ މައްސަލަތައް ކޮންމެ ދުވަހަކު ވެސް ފެންމަތިވަމުންދާ ކަމަށެވެ.
މިގޮތުން ކޮންމެ މައްސަލައަކަށް ބަލާލާއިރު ވެސް އޮންނަނީ ކޮންމެހެން ކުރަން ނުޖެހޭ ފައިސާގެ މުއާމަލާތެއް ކުރުމުގެ ސަބަބުން އުފެދޭ މައްސަލައެއް ކަމަށް ބީއެމްއެލް އިން ބުނެއެވެ.
މިފަދަ މައްސަލަތަކަށް އޮތް ހައްލަކީ އެއީ ހޭލުންތެރިކަން އިތުރުވުމާއެކު، ނުދަންނަ މީހުންނާ ފައިސާގެ މުއާމަލާތްތައް ކުރުން ހުއްޓާލުން ކަމަށް ބީއެމްއެލް އިން ވަނީ ބުނެފައެވެ.
ބީއެމްއެލްގެ ޕަބްލިކް ރިލޭޝަންސް މެނޭޖާ މުހައްމަދު ސައީދު ވިދާޅުވި ގޮތުގައި މިފަދަ ގޮތްގޮތަށް، އޮޅުވާލައިގެން ފައިސާގެ މުއާމަލާތްތައް އެކިގޮތްގޮތަށް ހިނގަމުންދާ ކަމަށެވެ. އާންމު ގޮތެއްގައި މަކަރާއި ހީލަތުން ފައިސާ ހޯދުމަށް ގުޅާ ފަރާތްތަކުން އޮޅުވާލުމަށްޓަކައި ތަފާތު އުކުޅުތައް ބޭނުންކުރަމުން އަންނަ ކަމަށް އޭނާ ފާހަގަކުރެއްވިއެވެ.
މި ގޮތުން ކުރީގެ ރައްޓެއްސެއްކަމަށް ބުނެ އޮޅުވާލާ، ސަޕްލައިކުރާ ކުންފުނީގެ ނަމުގައި ވެސް ގުޅާ ކަމަށް ސައީދު ވިދާޅުވިއެވެ. އަދި ބޭންކުގެ ނަމުގައިވެސް ގުޅާކަމަށް އޭނާ ފާހަގަކުރެއްވިއެވެ.
ބީއެމްއެލް އިން ވަނީ މިކަމަށް އާންމުން ސަމާލުވުމަށް އެދިފައެވެ. އަދި އެފަދަ ކޯލްތަކަށް ޖަވާބުދާރީ ނުވުމަށް ވެސް ބީއެމްއެލް އިން އެދެއެވެ. އަދި ކާކުކަން ނޭނގޭ ފަރާތްތަކާ އެކު ފައިސާގެ މުއާމަލާތްތައް ނުކުރުމަށާއި އަދި މިފަދަ މައްސަލަތަކަށް ހުރިހާ ފަރާތްތަކުން ވެސް ހާއްސަ ސަމާލުކަމެއް ދިނުމަށް ބީއެމްއެލްއިން ވަނީ އިލްތިމާސް ކޮށްފައެވެ.
