ބަޔަކު އިސްވެ ފުރައްސާރަ ކުރުމުގެ ކުރިން އަދި ދުރާލާ ރާވައިގެން ރަޝިއާއިން ޔޫކްރައިންއަށް ދީފާނެ ހަމަލާއަކަށް ހުޅަނގުން އޮތީ ތައްޔާރު ވެ ކަމަށް، އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
ރަޝިއާގެ ރައީސް ވްލޭޑްމިއާ ޕޫޓިން ހީފުޅު ކުރައްވައިގެން ހުންނެވީ ހުޅަނގާއި ނޭޓޯއިން އިޖާބައެއް ނުދޭނެ ކަމަށް ކަމަށާ، ޕޫޓިން ހީފުޅު ކުރައްވައިގެން ހުންނެވީ އަމިއްލަ ވަޒަނުގައި ބައިބައިވެގެން ދާނެ ކަމަށް ކަމަށްވެސް ބައިޑަން ވިދާޅުވިއެވެ. ނަމަވެސް ޕޫޓިންއަށް ކުރެއްވުނީ ކުށްހީފުޅެއް ކަމަށާ، ހުޅަނގުން އޮތީ ތައްޔާރުވެގެން ކަމަށް ބައިޑަން ވިދާޅުވިއެވެ.
މި ރޫހުގައި ބައިޑަން ވާހަކަފުޅު ދައްކަވާފައި މިވަނީ، އެމެރިކާގެ ގާނޫނު ހަދާ މަޖިލީހުގައި މީގެ ކުޑަ ވަގުތު ކޮޅެއް ކުރިން ދެއްވި ސްޓޭޓް އޮފް ދަ ޔޫނިއަން ތަގުރީރުގައެވެ. އަހަރުގެ ރިޔާސީ އެޖެންޑާ ބައްޓަން ވެގެން ދާނެ ގޮތުގެ ތަސައްވުރެއް ކަމުގައި ބަލާ ސްޓޭޓް އޮފް ދަ ޔޫނިއަން އެޑްރެސް، ބައިޑަން ދެއްވާފައި މި ވަނީ ހައްސާސީ ދަނޑިވަޅެއްގައެވެ.
ގަޑިއެއްހާއިރަށް ދެމިގެންގެންދިޔަ ތަގުރީރުގެ ބޮޑު ބައެއް ބައިޑަން ހާއްސަ ކުރެއްވީ ރަޝިއާއިން ޔޫކްރައިންގައި މިހާރު ކުރަމުންދާ ހަނގުރާމައިގެ މައްޗަށެވެ. ތަގުރީރު ފެއްޓެވުމުގެ ކުރިންވެސް ބައިޑަން ވަނީ ޔޫކްރައިންގެ ރައީސް ވްލޮޑޮމީރް ޒެލެންސްކީއާ ފޯނުން ގުޅުއްވާ، އެމެރިކާއަށް ފޯރުކޮށްދެވިދާނެ އެހީތަކާ ބެހޭ ގޮތުން ވާހަކަފުޅުދައްކަވާފައެވެ.
ބައިޑަން ވަނީ، ހުދުމުހުތާރު ޑިކްޓޭޓަރުން، އެކަމުގެ އަގު އަދާ ކުރަންޖެހޭނެ ކަމަށް ވިދާޅުވެ ރަޝިއާގެ ރައީސް ވްލޭޑްމިއާ ޕޫޓިންއަށް އިންޒާރުގެ މެސެޖެއް ދެއްވާފައެވެ. އަދި އޮޅުމެއް ނުވާ ވަރުގެ ސިގުނަލެއް ރަޝިއާއަށް ފިނުވުމަށްވެސް ބައިޑަން ވަނީ އެމެރިކާގެ ގާނޫނު ހަދާ މަޖިލީހަށް ގޮވާލައްވާފައެވެ.
ރަޝިއާއިން ޔޫކްރައިންއަށް އަރާ، ކުރަމުން ދާ ހަނގުރާމާގައި އެމެރިކާއިން މިހާރުވެސް ދަނީ އެކި ގޮތްގޮތުން ޔޫކްރައިންއަށް އެހީ ފޯރުކޮށްދެމުންނެވެ.
