ރާއްޖޭގެ މީހުން ދިރިއުޅޭ 10 ރަށެއްގައި ވައި ސާފު މިންވަރު ދެނެގަންނަ ސެންސަރު ހަރުކުރަން ނިންމައިފިއެވެ.
މިގޮތުން މިއަދު އައްޑޫ ސިޓީ ކައުންސިލުގައި ސާފު މިންވަރު ދެނެގަންނަ ސެންސަރެއް ހަރުކޮށްފައިވާ ކަމަށް އެންވަޔަރަމަންޓް މިނިސްޓްރީ ވަނީ ބުނެފައެވެ.
މިނިސްޓްރީގެ މުވައްޒަފުންގެ ބެލުމުގެ ދަށުން މި ސެންސަރުތައް ހަރުކުރާއިރު، އެއިން ކޮންމެ ރަށެއްގައި އާއްމުންނަށް މިކަމަށް ހޭލުންތެރިކުރުމަށް މައުލޫމާތު ދިނުމުގެ ހާއްސަ ސެޝަންތަކެއް ބޭއްވުމަށް ހަމަޖެހިފައިވާ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ ޖަރުމަނު ވިލާތުގެ ބްރޭންޑެއްކަމަށްވާ "އައިކިއު އެއާ"ގެ ވައިގެ ސާފު މިންވަރު ދެނެގަންނަ ސެންސަރު ހަރުކުރުމަށްޓަކައި މިންކުރެވިފައިވަނީ އާބާދީގެގޮތުން ގިނަބަޔަކު ދިރިއުޅެމުންދާ ރަށްތަކުގައި ކަމަށެވެ.
މި ރަށްތަކަކީ ހދ. ކުޅުދުއްފުށި، ށ. ފުނަދޫ، ޅ. ނައިފަރު، ކ. މާލެ، ކ. ހުޅުމާލެ، ދ. ކުޑަހުވަދޫ، ލ. ގަން، ގދ. ތިނަދޫ، ސ. ހިތަދޫ، އަދި ޏ. ފުވައްމުލަކެވެ.
ވައިގެ ސާފު މިންވަރު ދެނެގަންނަ ސެންސަރެއް އެންމެ ފުރަތަމަ ހަރުކޮށްފައިވަނީ 2021 ވަނަ އަހަރު މިނިސްޓްރީގެ މައި އޮފީސް ހުންނަ ގްރީން ބިލްޑިންގް ގައެވެ.
މިނިސްޓްރީން ބުނީ އެންވަޔަރަންމަންޓް ޕްރޮޓެކްޝަން އެޖެންސީއިން ވައިގެ ސާފު މިންވަރު ރިޕޯޓުކުރުމަށް ހިޔާރުކޮށްފައިވާ އިންޑެކްސްއަކީ، އެމެރިކާގައި ވައިގެ ސާފު މިންވަރު ދެނެގަތުމަށް ބޭނުންކުރާ އިންޑެކްސްއެއް ކަމަށެވެ. މިއީ އޭކިއުއައި ނުވަތަ އެއާ ކޮލިޓީ އިންޑެކްސެއް ކަމަށާއި އެގޮތުން އެއާ ކޮލެޓީ އިންޑެކްސް 6 ކެޓަގަރީއަކަށް ބެހިފައިވާއިރު ކޮންމެ ކެޓަގަރީއަކުންވެސް ތަފާތު މިންވަރަކަށް އޭގެ އަސަރު ސިއްހަތަށް ކުރާ ކަމަށް މިނިސްޓްރީން ބުނެއެވެ.
މި ސެންސަތަކުން ފަސް އަހަރުގެ މުއްދަތަކަށް، ވައިގެ ސާފު މިންވަރު ވަޒަންކުރުމަށް ބޭނުންވާ ޑޭޓާ ކަމާބެހޭ އިދާރާތަކަށް ފޮނުވައި ދޭނެ އެވެ. ވައިގެ ސާފު މިންވަރަށް ބަލައި، ސިއްހީ ލަފާ މި މޮނިޓަރިން ސެންސަގެ ޒަރިއްޔާއިން އާއްމުންނަށް ވެސް ލިބިގެންދާނެ އެވެ.
މީގެ އިތުރުން، އެއްކުރެވޭ ޑޭޓާގެ އަލީގައި ވައިގެ ނުސާފުކަން ނުވަތަ ތަޢައްޔަރުވެފައިވާ މިންވަރު ދެނެގަނެވި، އެ ޑޭޓާތައް ތަހުލީލުތަކާއި ދިރާސާތައްކުރުމަށް ބޭނުންކުރެވޭނެ އެވެ. މީގެ އިތުރުން "އައިކިއު އެއާ"ގެ މޯބައިލް އެޕްލިކޭޝަން އިންސްޓޯލް ކުރުމާއެކު ވެބްސައިޓް ގެ އެހީގައި ވައިގެ ސާފު މިންވަރު އަންގައިދޭ ޑޭޓާ އާއްމުންނަށް ފެންނަން ހުންނާނެއެވެ.
މިނިސްޓްރީން ބުނީ ރާއްޖޭގައި ވައި ނުސާފުވުމަށް ކުރިމަތިވާ މައިގަނޑު ސަބަބުތައް ކަމަށް ދިރާސާތަކުން ދައްކަނީ ދުއްވާ އެއްޗެއްސާއި އުޅަނދުފަހަރާއި، ކުނި އެންދުމާއި، ފައިބަރު އުޅަނދުފަހަރު ބަނުމާއި، ކޮންސްޓްރަކްޝަން ސިނާއަތުން ކަމަށެވެ.
މި މަޝްރޫޢާ ގުޅިގެން މިނިސްޓްރީން މާލޭގައި ކުރިއަށްދާ "އިންޓަގްރޭޓެޑް، ސަސްޓެއިނަބަލް އެންޑް ލޯ އެމިޝަން ޓްރާންސްޕޯޓް އިން މޯލްޑިވްސް" މަޝްރޫއުގެ ދަށުން، 2 އިލެކްޓްރިކް މިނީ ބަސް ގަތުމާއި އަދި ޗާޖިންގް ސްޓޭޝަން ގާއިމުކުރުން ހިމެނޭ ކަމަށް މިނިސްޓްރީން ބުނެއެވެ.
މީގެ އިތުރުން، މާލެ އާއި ހުޅުމާލޭގައި އީ-ބައިކް ސްކީމް ތައާރަފުކޮށް 200 އިލެކްޓްރިކް ޕެޑަލް އެސިސްޓެޑް ބައިސްކަލު ގަތުމަށް ވެސް ވަނީހަމަޖެހިފައެވެ. ހަމައެއާއެކު، ގްރޭޓާ މާލެ ރީޖަންގައި އެއާ ކޮލިޓީ މޮނީޓަރިން ސްޓޭޝަނެއް ގާއިމުކުރުމުގެ މަސައްކަތް ވެސް މި މަޝްރޫއުގެ ތެރެއިން ކުރެވިގެންދާނެ ކަމަށް މިނިސްޓްރީން ބުނެއެވެ.
