އޮސްޓްރޭލިއާގެ އަސްކަރީ މަތިންދާބޯޓަކަށް، ޗައިނާގެ ކަނޑުގެ އަސްކަރީ އުޅަނދަކުން ލޭޒާ އަލި އެޅުވި އެޅުވުމަކީ، ބިރު ދެއްކުމުގެ ގޮތުން ޗައިނާއިން ހިންގި އަމަލެއް ކަމަށް އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ތުހުމަތު ކުރައްވައިފިއެވެ.
އޮސްޓްރޭލިއާގެ އަސްކަރީ މަތިންދާބޯޓަކަށް، ޗައިނާގެ ކަނޑުގެ އަސްކަރީ އުޅަނދަކުން ލޭޒާ އަލި އެޅުވި ހާދިސާ ހިނގާފައި ވަނީ މިދިޔަ ބުރާސްފަތި ދުވަހުއެވެ.
ހާދިސާ ހިނގާފައި ވަނީ އުތުރު ފަރާތުން އޮސްޓްރޭލިއާއަށް ވަދެވެން އޮންނަ ސަރަހައްދުން، އެ ގައުމުގެ އަސްކަރީ މަތިންދާބޯޓު އުދުހެމުން ދިޔަ ވަގުތެއްގައި ކަމަށާ، އެ އަމަލަކީ މީހުންގެ ފުރާނައަށް ނުރައްކާ ކުރިމަތި ކުރަނިވި އަމަލެއް ކަމަށް އޮސްޓްރޭލިއާގެ ދިފާއީ ވުޒާރާއިންވެސް ވަނީ ބުނެފައެވެ.
މޮރިސަން ވިދާޅުވީ، މި އަމަލަށް ޗައިނާ ޖަވާބުދާރީ ކުރައްވާނެ ކަމަށެވެ. އޮސްޓްރޭލިއާގެ އަސްކަރީ މަތިންދާބޯޓަކަށް، ޗައިނާގެ ކަނޑުގެ އަސްކަރީ އުޅަނދަކުން ލޭޒާ އަލި އެޅުވިވުމަކީ ބިރު ދެއްކުން ނޫން ދެވަނަ ނިޔަތެއް އޮވެގެން ޗައިނާއިން ހިންގި އަމަލެއް ނޫން ކަމަށް ވިދާޅުވަމުން މޮރިސަން ވަނީ، ބިރު ދެއްކުމުގެ ގޮތުން ހިންގާ މިފަދަ އަމަލުތަކަކީ އޮސްޓްރޭލިއާއިން ބަލައިގަންނާނެ އަމަލުތަކެއް ނޫން ކަމަށްވެސް ވިދާޅުވެފައެވެ.
އޮސްޓްރޭލިއާގެ ދިފާއީ ވަޒީރު ޕީޓާ ޑަޓަން ވިދާޅުވީ، ޗައިނާއިން ހިންގާ، ހަނގާ ކުރުމާއި ފުރައްސާރައިގެ މިފަދަ ޖަރީމާތަކުގެ ވާހަކަ އެއްވެސް ބަޔަކު ނުދައްކާނެ ކަމަށް ޗައިނާގެ ސަރުކާރުން އުއްމީދު ކުރާ ކަމަށެވެ.
އޮސްޓްރޭލިއާގެ އަސްކަރީ މަތިންދާބޯޓަކަށް ލޭޒާ އަލި އަޅުވައިގެން ދިއްލާފައި ވަނީ އަރަފޫރާ ކަނޑުގެ ސަރަހައްދުން ދަތުރުކުރަމުން ދިޔަ ޗައިނާގެ ކަނޑުގެ އަސްކަރީ އުޅަނދަކުންނެވެ.
އޮސްޓްރޭލިއާއާއި ޗައިނާއާ ދެމެދު ގުޅުންތައް އިންތިހާއަށް ހީނަރުވީ، ވާވޭ 5ޖީ ޓެކްނޮލޮޖީ ބޭނުން ކުރުމާ ދެކޮޅަށް، 2018 ވަނަ އަހަރު އޮސްޓްރޭލިއާގެ ސަރުކާރުން އަމުރު ނެރުނު ހިސާބުންނެވެ.
