މާލެ ސިޓީ ކައުންސިލްގައި މަސައްކަތްކުރާ އިދާރީ މުވައްޒަފުން ކުރާ މަސައްކަތްތަކުގެ އަގުވަޒަން ކުރުމުގެ ގޮތުން މުވައްޒަފުންނަށް ހާޒިރީ އެލަވަންސެއް ދިނުމަށާއި، ކޮންމެ ތިން މަހަކުން އެއް މަހު ކޮންމެ ޑިޕާޓްމަންޓަކުން އެންމެ މޮޅު މުވައްޒަފު ހޮވައި ބޯނަހެއް ދިނުމަށް އެ ކައުންސިލުން ނިންމައިފިއެވެ.
މާލޭގެ މޭޔަރު ޑރ. މުހައްމަދު މުއިއްޒުގެ އިސްނެންގެވުމުގެ މަތިން، މާފަންނު އުތުރު ދާއިރާގެ ކައުންސިލަރު އާމިނަތު ޔުމްނާ ހުށަހަޅުއްވައި، މާފަންނު ދެކުނު ދާއިރާގެ ކައުންސިލަރު އަބްދުﷲ ނާސިރު ތާއީދުކުރެއްވި މި ހުށަހެޅުން ފާސްވެފައިވަނީ މިއަދުގެ ޖަލްސާގައި ބައިވެރިވެ ވަޑައިގަތް މެންބަރުންގެ އިއްތިފާގުންނެވެ.
އެހެންކަމުން، އިދާރީ މުވައްޒަފުން ހާޒިރުވާ ކޮންމެ ދުވަހަކަށް ހާޒިރީ އެލަވަންސްގެ ގޮތުގައި 75ރ ދިނުމަށް ކައުންސިލުން ވަނީ ނިންމާފައެވެ.
މުވައްޒަފުންނަށް ހާޒިރީ އެލަވަންސް ދެނީ ކައުންސިލްގެ ރެވެނިއު ބަޖެޓުންނެވެ. ރެވެނިއު ބަޖެޓަށް ކައުންސިލުން އާމްދަނީ ހޯދަނީ އާންމުންނަށް ހިދުމަތް ދިނުމަށްޓަކައި ކައުންސިލުން ކުރާ މަސައްކަތްތަކުންނެވެ.
މިއަދު ބޭއްވި ކައުންސިލްގެ އާންމު ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، ސިޓީ ކައުންސިލްގައި މަސައްކަތްކުރާ އިދާރީ މުވައްޒަފުންނަށް ހާޒިރީ އެލަވަންސެއް ދޭން ނިންމާފައިވަނީ، ސިޓީ ކައުންސިލްގެ މުވައްޒަފުންނަކީ މާލޭގެ ރައްޔިތުންނަށް ހިދުމަތް ފޯރުކޮށްދިނުމުގައި އަގުހުރި މަސައްކަތްތަކެއް ކުރަމުން ގެންދާ މުވައްޒަފުންތަކަކަށް ވެފައި، ވަޒީފާ އަދާކުރުމުގައިވެސް ވަރަށް ގިނަ ވަގުތު ހޭދަކުރަމުން ގެންދާ މުވައްޒަފުންތަކަކަށް ވާތީ ކަމަށެވެ.
މުއިއްޒު ވިދާޅުވި ގޮތުގައި، މިފަދަ އެލަވަންސެއް ދިނުމަކީ މުވައްޒަފުން ވަޒީފާއަށް ހާޒިރުވުމާއި ވަޒީފާގައި ދެމެހެއްޓުމަށްޓަކައި ވަރަށް މުހިންމު ކަމެކެވެ.
މީގެ އިތުރުން މޭޔަރު ވިދާޅުވީ މުވައްޒަފުންގެ އަގު ވަޒަންކުރުމަކީ ވަރަށް މުހިންމު ކަމެއް ގޮތުގައި ޤަބޫލުކުރަންޖެހޭ ކަމަށާއި، މިފަދަ އެލަވަންސް އެއް ތަޢާރަފް ކުރުމުން މުވައްޒަފުން ރައްޔިތުންނަށް ދެމުންދާ ޚިދުމަތްތައްވެސް އިތުރަށް ފުރިހަމަވެގެން ދާނެ ކަމަށް ޤަބޫލުކުރެވޭ ކަމަށެވެ.
"އޭގެ ސަބަބުން ރައްޔިތުންނަށް ދޭ ޚިދުމަތްތައްވެސް ދާނީ ރަނގަޅުވަމުން. އެ މުވައްޒަފުންގެ ޖޯޝާއި ހިތްވަރާއި އެކީގައި އަދި އިތުރަށްވެސް މަސައްކަތްކުރަން ލިބޭ ހިތްވަރަކަށްވާނެ. އޭގެ ނަތީޖާ އަކީ ރައްޔިތުނަށް ރަނގަޅު ޚިދުމަތްތަކެއް މިހާރަށްވުރެ ރަނގަޅަށް ލިބިގެން ދިއުން." މުއިއްޒު ވިދާޅުވިއެވެ.
ހާޒިރީ އެލަވަންސްގެ އިތުރުން، ކޮންމެ ތިންމަހަކުން އެއް މަހު، ސިޓީ ކައުންސިލްގެ ކޮންމެ ޑިޕާޓްމެންޓެއްގެ އެންމެ ރަނގަޅު މުވައްޒަފު ކަނޑައަޅައި އެ މުވައްޒަފު ކުރާ މަސައްކަތްތަކުގެ އަގު ވަޒަންކުރުމުގެ ގޮތުން ހަނދާނީ ލިޔުމަކާ އެކު 1،000ރ ގެ ބޯނަސްއެއް ދިނުމަށް އެދި މެދު ހެންވޭރު ދާއިރާގެ ކައުންސިލަރު ރަމީޒް ހުށަހަޅުއްވައި، ވިލިމާލެ ދާއިރާގެ ކައުންސިލަރު ނަހުލާ އަލީ ތާއީދު ކުރެއްވި ހުށަހެޅުންވެސް ވަނީ ފާސްކޮށްފައެވެ.
ސިޓީ ކައުންސިލުން ނިންމި ނިންމުންތަކުގެ ސަބަބުން މާލޭގެ ރައްޔިތުންނަށް ކައުންސިލުން ދެމުންގެންދާ ހިދުމަތްތަކަށް ކުރިއެރުމާން އަންނާނެ ކަމަށް އުންމީދު ކުރެވޭ ކަމަށާއި، މުވައްޒަފުންނަށް ފަސޭހަތަކެއް ލިބިގެންދާނެ ކަމަށްވެސް އުންމީދު ކުރައްވާކަމަށް މުއިއްޒު ވިދާޅުވިއެވެ.
