ބޮޑު މުސާރައާއެކު އެމްޓީސީސީގެ ޓެކްނިކަލް ވަޒީފާތަކަށް ދިވެހިން ތަމްރީން ކުރުމަށް ބާއްވާ "ހުނަވަރު އެޕްރެންޓިސްޝިޕް ޕްރޮގްރާމް"ގެ މި އަހަރުގެ ފުރަތަމަ ޕްރޮގްރާމް އިފްތިތާހު ކޮށްފިއެވެ.
މި ޕްރޮގުރާމު އިފްތިތާހު ކޮށްފައި ވަނީ މިކަމަށްޓަކައި މިއަދު އެމްޓީސީސީގެ ހެޑް އޮފީހުގައި ބޭއްވި ޕްރެސް ކޮންފަރެންސްގައެވެ.
އެމްޓީސީސީގެ ފަރާތުން މިއަހަރުގެ ފުރަތަމަ ކުއާޓާގައި ފެށުމަށް ހަމަޖެހިފައިވާ "ހުނަވަރު އެޕްރެންޓިސްޝިޕް ތަމްރީން ޕްރޮގްރާމް"ގެ ތަފްސީލް ހިއްސާކޮށްދެއްވީ ސީއީއޯ އާދަމް އާޒިމްއެވެ.
އެމްޓީސިސީން ބުނީ ހުނަވަރު ޕްރޮގްރާމްއަކީ މަސައްކަތުގެ މާހައުލުގައި ފަންނީ ތަމްރީން ލިބިފައިވާ ދިވެހިން ބިނާކުރުމަށް އެމްޓީސީސީއިން ކުރިއަށް ގެންދާ ޕްރޮގްރާމެއް ކަމަށެވެ. މި ޕްރޮގްރާމް ގެ މަގްސަދަކީ ތަމްރީނާއި، ތަޖުރިބާ ލިބިފައިވާ މަސައްކަތްތެރި މުވައްޒަފުން އެމްޓީސީސީގެ އެކި ވަޒީފާތަކަށް ހޯދުން ކަމަށް އެކުންފުނިން ބުނެއެވެ.
ހުނަވަރު ޕްރޮގްރާމް 2 ބަޔަކަށް ބެހިގެން ދާއިރު އެއީ ހުނަވަރު ލައިސެންސިން ޕްރޮގްރާމްއާއި ހުނަވަރު ޓެކްނިކަލް ސްކިލްސް ޕްރޮގްރާމު ކަމަށް އެމްޓީސީސީން ވަނީ ބުނެފައެވެ.
މިއަހަރު މިޕްރޮގްރާމްގެ ދަށުން 140 މީހުން ތަމްރީނު ކުރުމަށް ފުރުސަތު ހުޅުވިގެންދާނެ ކަމަށް އެމްޓީސީސީން ވަނީ ފާހަގަކޮށްފައެވެ.
އެމްޓީސީސީން ބުނީ މި ޕްރޮގްރާމްގެ ދަށުން ވެލްޑިންގް، މެރިން އަދި ޓަގް މެކޭނިކް މަސައްކަތް، ހެވީ ވެހިކަލް އޮޕަރޭޓަރުން، ޓިންކަރުން އަދި ކޮންސްޓްރަކްޝަން ސައިޓްސުޕަވައިޒް ކުރުން ފަދަ ދާއިރާތަކަށް މީހުން ތަމްރީން ކުރެވިގެންދާނެ ކަމަށެވެ. އަދި މި ޕްރޮގްރާމްގެ ދަށުން ކޮންމެ ބައިވެރިޔަކުވެސް 3 މަސް ދުވަހުގެ މުއްދަތަށް ތަމްރީން ކުރެވިގެންދާނެ ކަމަށް އެމްޓީސީސީން ބުނެއެވެ.
އެމްޓީސީސީން އިތުރަށް ބުނީ މި ޕްރޮގްރާމްގެ ބައިވެރިންނަށް 5000 ރުފިޔާގެ އެލަވަންސެއް ކޮންމެ މަހަކު ލިބޭނެ ކަމަށާއި ވޯކް ސައިޓްގެ ރަށް ނޫން އެހެން ރަށެއްގައި ދިރިއުޅޭނަމަ ހުރުމާއި ކެއުން ހަމަޖައްސައި ދޭނެ ކަމަށެވެ. 3 މަހުގެ ތަމްރީން ފުރިހަމަ ކޮށް ވަޒީފާ ދާއިމީ ވާ ފަރާތްތަކަށް 10،000 ރުފިޔާއާއި 25،000 ރުފިޔާއާ ދެމެދުގެ މުސާރަ ލިބުމުގެ ފުރުސަތު އޮތް ކަމަށް އެމްޓީސީސީން ބުނެއެވެ.
2021 ވަނަ އަހަރު މި ޕްރޮގްރާމް އައްޑޫ އަދި ފުވައްމުލަކުގައި ވަނީ ކުރިއަށް ގެންގޮސް ފައެވެ. އެގޮތުން އެޕްރޮގްރާމްގެ ތެރެއިން ކާމިޔަބުކަމާއެކު ތަމްރީންކޮށް އަދި ލައިސަންސް ލިބި ކުންފުނީގެ މުވައްޒަފުންގެ ގޮތުގައި 14 ފަރާތެއް މިހާރު ވެސް ވަޒީފާ އަދާކުރަމުންދާ ކަމަށް އެމްޓީސީސީން ބުނެއެވެ.
މިއަހަރު ފުރަތަމަ ކުއަޓަރުގައި މިޕްރޮގްރާމްގެ އޯޕަންޑޭ ބޭއްވުމަށް ހަމަޖެހިފާވަނީ ހދ. ކުޅުދުއްފުށި (ފެބްރުއަރީ 4)، ލ. ފޮނަދޫ (ފެބްރުއަރީ 6) އަދި މާލޭ (ފެބްރުއަރީ 5) ގައެވެ.
