ރާއްޖެއިން ބޭރުގެ އާގުބޯޓެއްގައި އޮތް ހާލު ބޮޑު ބަލި މީހަކަށް އެމްއެންޑީއެފް ސަދަން އޭރިއާ ކޮމާންޑުން އެހީތެރިކަން ފޯރުކޮށްދީފިއެވެ.
އެމްއެންޑީއެފުން ބުނީ، ސައުތު އެފްރިކާއިން ފުރައިގެން ސިންގަޕޫރަށް ދަތުރުކުރި ލައިބޭރިއާގެ ކާގޯ ބޯޓެއް ކަމުގައިވާ "ޓްރޫ ޗެމްޕިއަން" ގައި އޮތް ހާލު ބޮޑު ބަލި މީހާއާ ގުޅޭ ރިޕޯޓް އެމްއެންޑީއެފް ސަދަން އޭރިއާ ކޮމާންޑަށް އިއްޔެ ހަވީރު 16:53 ހާއިރު ލިބިފައިވާ ކަމަށެވެ.
އޭރު މި ބޯޓް ދަތުރު ކުރަމުން ދިޔައީ ސ.ގަމުގެ ހުޅަނގު ދެކުނުން 235 ނޯޓިކަލް މޭލު ބޭރުން ކަމަށް އެމްއެންޑީއެފުން ބުނެއެވެ.
އެމްއެންޑީއެފުން ބުނީ، ސަރުކާރުގެ ކަމާބެހޭ އިދާރާތަކުގެ ހުއްދައާއެކު މި ބޯޓު، ސ. ގަމު ދެކުނުން 3 މޭލަށް ކައިރި ކުރުމުން އެމްއެންޑީއެފް ސަދަން ކޮމާންޑު، ކޯސްޓްގާޑް ފޯތު ސްކޮޑްރަންގެ ހާބާކްރާފްޓް 105 ލޯންޗް ޑޮކްޓަރުންގެ ޓީމަކާއެކު ބޯޓު އޮތް ސަރަހައްދަށް ގޮސް ބަލިމީހާ މިއަދު ހެނދުނު 11:20 ހާއިރު ސ. ހިތަދޫއަށް ގެންގޮސްދީފައިވާ ކަމަށެވެ.
މި ބަލި މީހާ އެމްބިއުލާންސްގައި އައްޑޫ އިކުއެޓޯރިއަލް ހޮސްޕިޓަލަށް ގެންގޮސްފައިވާ ކަމަށް ވެސް އެމްއެންޑީއެފުން ވަނީ ބުނެފައެވެ.
ވިއެޓްނާމަށް ނިސްބަތްވާ މި ބަލި މީހާ އައްޑޫ އިކުއެޓޯރިއަލް ހޮސްޕިޓަލަށް ގެންދެވިފައި ވަނީ "ހެޕަޓައިޓިސް ވިތު ހައިޕާލިބިރޫބިނީމިއާ" ކިޔާ ބަައްޔެއް ޖެހި އަވަސް ފަރުވާއަށް ބޭނުންވެގެން ކަމަށް އެމްއެންޑީއެފުން ބުނެއެވެ.
