ހުޅުމާލޭގައި މިރޭ ފާހަގަކުރާ އާ އަހަރުގެ ޝޯ އާ ދިމާކޮށް އެމްޓީސީސީން ބަސް ދަތުރު ކުރާ ވަގުތުތައް އިތުރު ކޮށްފިއެވެ.
އާންމުކޮށް އެމްޓީސީސީގެ ބަސް ދަތުރުތައް ކުރިއަށް ގެންދަނީ ކޮންމެ ދުވަހަކު ފަތިހު 5:30 އިން ފެށިގެން އެންމެ ފަހު ދަތުރު ރޭގަނޑު 11:30 ގައި ކުރާ ގޮތަށެވެ.
އެހެންނަމަވެސް، އެމްޓީސީސީން ވަނީ ބަސް ދަތުރުތައް ކުރާ ވަގުތު މިރޭ ދަންވަރު 1:30 އާ ހަމައަށް އިތުރު ކޮށްފައެވެ. އެގޮތުން، ވެސްޓްޕާކުން ކުރާ ދަތުރުތަކާއި، ކާނިވަލުން ކުރާ ދަތުރުތަކާއި، ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވައްސާ ދެމެދު ކުރާ ދަތުރުތައް މިރޭ 1:30 ގެ ނިޔަލަށް ކުރިއަށް ދާނެއެވެ.
އެމްޓީސީސީން ބަސް ދަތުރުތަކުގެ ވަގުތުތައް މިރޭ އިތުރުކޮށްފައިވާއިރު، ހުޅުމާލޭގައި އާ އަހަރު ފާހަގަކުރުމުގެ ގޮތުން "މަރުހަބާވީސް"ގެ ނަމުގައި ޔޫތު މިނިސްޓްރީން އާ އަހަރު ފާހަގަކުރުމަށް ހުޅުމާލެ ދުވާ ޓްރެކްގައި މިރޭ ޝޯއެއް ބާއްވަން ވަނީ ހަމަޖެހިފައެވެ.
މީގެ އިތުރުން، ހުޅުމާލެ ސެންޓްރަލް ޕާކްގައި މިރޭ 11:59 ގައި ހަވާ އެރުވުން ކުރިއަށް ދާނެއެވެ.
މިއީ ކޮވިޑަށް ފަހު މާލެ ސަރަހައްދުގައި އާ އަހަރު ފާހަގަކުރާ ފުރަތަމަ ފަހަރެވެ.
