ފުލުހަކަށް ހަމަލަދީ މާރާމާރީ ހިންގި މައްސަލައެއްގައި އިއްޔެ ތިން މީހަކު ހައްޔަރުކޮށް، އެމީހުން ހަތް ދުވަހަށް ބަންދުކޮށްފިއެވެ.
ފުލުހުން ބުނީ، މިދިޔަ ބުދަ ދުވަހުގެރޭ އާންމުންނަށް ނުރައްކާވާ ގޮތަށް ބާރު ސްޕީޑުގައި ދެ ސައިކަލެއް، ދިލްބަހާރުމަގާއި މަޖީދީމަގު ގުޅުނު ހިސާބުގައި ދުއްވަމުން ދަނިކޮށް އެ ސަރަހައްދުގައި ޓްރެފިކް ބަލަހައްޓަމުން ދިޔަ ފުލުހަކު، އެމީހުން ހުއްޓުވަން އުޅުމުން، އަމުރަށް ނުކިޔަމަންތެރި ވެ، ފުލުހަކާ މާރާމާރީ ހިންގާފައިވާ ކަމަށެވެ.
އެ މައްސަލައާ ގުޅިގެން ތިން މީހުން އިއްޔެ ހައްޔަރުކޮށްފައި ވާ ކަމަށް ފުލުހުން ބުންޏެވެ. އެ ތިން މީހުންނަކީ:
- މުހައްމަދު ވިއާމް (27އ)، އައްޑޫ ފޭދޫ / ވީނަސްވިލާ
- ހަސަން އަލީމް (22އ)، އައްޑޫ ހިތަދޫ / ފާނަފިލާގެ
- ޝާން އަބްދުﷲ (20އ)، މާލެ ދަފްތަރު ދރ2841
އެ މައްސަލާގައި އެތިން މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން، ހަތް ދުވަހުގެ މުއްދަތަކަށް އެމީހުން ކަސްޓޯޑިއަލް ޖަލެއްގައި ބަންދުކުރަން ވަނީ އަމުުރު ކޮށްފައެވެ. އެ ތިން މީހުންގެވެސް ކުށުގެ ރެކޯޑު އޮންނަ ކަމަށް ފުލުހުން ބުނުމުގެ އިތުރުން 3 މީހުންވެސް ނިސްބަތްވަނީ މާލޭގައި ހަރަކާތްތެރިވާ ގްރޫޕަކަށް ކަމަށްވެސް ފުލުހުން ބުންޏެވެ.
ފުލުހުން ބުނީ، މާލޭގެ މަގުތަކުގެ ހަމަޖެހުން ގެއްލުވާލައި ގްރޫޕްތަކުން ކުރާ މިފަދަ ކަންކަން ހުއްޓުވުމަށް މަސައްކަތް ކުރަމުން ދާނެ ކަމަށެވެ.
