އައްޑޫގެ މިސްކިތަކަށް މީހަކު ބޮޑުކަމުގޮސްފި

އައްޑޫސިޓީ ފޭދޫ އަވަށުގެ މިސްކިތަކަށް މީހަކު ބޮޑުކަމު ގޮސްފިއެވެ.

"ދަ ޕްރެސް" އަށް މައުލޫމާތު ދެއްވަމުން ފޭދޫ މަގުއްދޫ ދާއިރާގެ ކައުންސިލަރު އާމިނަތު ސަލްމާ ވިދާޅުވީ، ބޮޑު ކަމު ގޮސްފައި ވަނީ ފޭދޫގެ މިސްކިތެއް ކަމަށްވާ ފޭދޫގެ މަސްޖިދުލް އަމާނި މިސްކިތައް ކަމަށެވެ.

މީގެ އިތުރުން މަސްޖިދުލް ނަސްރި އަށް ވަދެ ބަޔަކު އެތަނަށް ގެއްލުން ދީފައިވާ ކަމަށް ވެސް ސަލްމާ ވިދާޅުވިއެވެ. މިގޮތުން އެމިސްކިތުގެ ހަތިމްތައް ބިންމައްޗަށް ވައްޓާލާފައި ހުރި ކަމަށް ސަލްމާ ވިދާޅުވިއެވެ.

ސަލްމާ ވިދާޅުވީ ބޮޑުކަމުގޮސްފައި ހުރިތަން ފެނިފައިވަނީ ފަތިހު ނަމާދަށް ދިޔަ އިމާމަށް ކަމަށެވެ.

އެކަމާ ގުޅިގެން "ދަ ޕްރެސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ގަމު މިސްކިތަށް ބޮޑު ކަމު ދިޔަ މައްސަލައަކާއި އެހެން މިސްކިތަކަށް ގެއްލުންދިން މައްސަލައެއް ރޭ ފަތިހު 05:45 ހާއިރު ރިޕޯޓު ކޮށްފައިވާ ކަމަށެވެ.

އެމައްސަލާގައި 47 އަހަރުގެ ފިރިހެނަކު ހައްޔަރު ކޮށްފައިވާ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.

ފޭދޫގެ މިސްކިތަކަށް ބޮޑުކަމު ދިޔަ މައްސަލައެއް ފެންމަތިވެފައި ވާއިރު މިސްކިތްތަކަށް ކުޑަކަމުގޮސް އަދި އިބްރާހީމް މިސްކިތުގައި ބާއްވާފައި އޮތް ހަތިމަކަށް ކުޅު ޖެހި މައްސަލައިގައި މީހަކު ވަނީ ޖަލަށް ވެސް ލައިފައެވެ.

މިދިޔަ އޮކްޓޫބަރު މަހުގެ ހަތަރުވަނަ ދުވަހު އެ މައްސަލައިގައި ހަސަން ޒިޔާދު ކިޔާ މީހަކު އެންމެ ފުރަތަމަ ހައްޔަރު ކުރީ، ހުކުރު މިސްކިތާއި އިސްލާމީ މަރުކަޒުގެ އެތެރެއަށް އަދި ރައީސް އޮފީހުގެ ގޭޓު ކުރިމައްޗަށް ކުޑަކަމުދިއުމާ ގުޅިގެންނެވެ. ނަމަވެސް އެ މައްސަލާގައި އޭރު އޭނާ ވަނީ ދޫކޮށްލާފައެވެ. ފުލުހުން މީގެ ކުރިން ބުނީ ޒިޔާދަކީ ސިކުނޑިހަމަނުޖެހޭ މީހެއް ކަމަށެވެ. ނަމަވެސް ޖެންޑާއިން އޭނާގެ ސިކުނޑީގެ އުނިކަމެއް ނެތް ކަމަށް ބުނެފައި އޮއްވާ އޭނާ މިސްކިތަކަށް ވަދެ ހަތީމަނަކަށް ކުޅު ޖެހި މައްސަލައިގައި ހައްޔަރު ކުރުމަށް ފަހު ދެން ދުލެއް ނުކުރެއެވެ.

އިސްލާމީ މަރުކަޒަށާއި ޖުމްހޫރީ މައިދާނަށް ކުޑަކަމުދިޔަ މައްސަލާގައި، އާންމު މަސްލަހަތަށް ގެއްލުން ހުރި އަމަލެއް ކުރުމުގެ ދެ ދައުވާއެއް ޒިޔާދުގެ މައްޗަށް ކޮށްފައި ވާއިރު މި ދެ ދައުވާ އަށް ވެސް ޒިޔާދު ވަނީ ޝަރީއަތުގެ މަޖިލީހުގައި އިއުތިރާފް ވެފައެވެ.