މީގެ އަހަރެއްހާ ދުވަސް ކުރިން ހުސްވެފައިވާ ފުލުހުންގެ މީޑިއާ ޔުނިޓްގެ ހެޑުގެ މަގާމަށް ސްޕްރިންޓެންޑެންޓް އޮފް ޕޮލިސް ފާތިމަތު ނަޝްވާ ހަމަޖައްސައިފިއެވެ.
ނަޝްވާއާ އެ ޒިންމާ ހަވާލުކުރީ މިމަހުގެ ފުރަތަމަ ދުވަހުއެވެ.
އެންމެ ފަހުން ފުލުހުންގެ މީޑިއާ ޔުނިޓުގެ ހެޑަކަށް ހުންނެވީ ސްޕްރިންޓެންޑެންޓް އޮފް ޕޮލިސް އިޒްމިއާ ޒާހިރެވެ. ނަމަވެސް މިދިޔަ އަހަރުގެ ޖޫން މަހު އިޒްމިއާ އެހެން މަގާމަކަށް ބަދަލުކުރި ފަހުން ވަގުތީގޮތުން އެ މަގާމު ފުރުއްވާފައި ވަނީ ޗީފް ސްޕްރިންޓެންޑެންޓް އަދި ފުލުހުންގެ ތަރުޖަމާނު ޔޫނުސް ސޮބާހެވެ.
ފުލުހުންގެ މީޑިއާ ޔުނިޓްގެ ހެޑުގެ މަގާމާ ހަވާލުވި ސްޕްރިންޓެންޑެންޓް ނަޝްވާ ވަނީ އޮސްޓްރޭލިއާގެ ޔުނިވާސިޓީ އޮފް ސަދާން ކުއީންސްލޭންޑުން މާސް ކޮމިއުނިކޭޝަނުން ފުރަތަމަ ޑިގްރީ އާއި، ޔުނިވާސިޓީ އޮފް ބަލާޓުން ބިޒްނަސް އެޑްމިނިސްޓްރޭޝަނުން މާސްޓާ ޑިގްރީ އާއި، މެލޭޝިއާގެ ސްޓެމްފޯޑް ކޮލެޖުން ޕަބްލިކް ރިލޭޝަންސްގެ ދާއިރާއިން ޑިޕްލޮމާ ފުރިހަމަ ކުރައްވާފައެވެ.
މީގެ އިތުރުން، 25 އަހަރަށް ވުރެ ގިނަ ދުވަހު ފުލުހުންނަށް ހިދުމަތްކުރައްވާފައިވާ ނަޝްވާ ވަނީ މީގެ ކުރިން ބައެއް އަތޮޅުތަކުގެ ކޮމާންޑަރުކަން ކުރައްވައި، ޕޮލިސް އެކަޑަމީން ހިންގާ ކޯސްތަކުގައި އެތައް ފުލުހުންނަށް ތަމްރީނު ދެއްވުމުގައި ހަރަކާތްތެރިވެ ވަޑައިގަންނަވާފައެވެ.
ނަޝްވާއަކީ ފުލުހުންގެ މީޑިއާ ޔުނިޓުގެ ހެޑުގެ މަގާމަށް އައްޔަނުކުރި ދެވަނަ އަންހެން ބޭފުޅާއެވެ.
