އެސްޓީއޯގެ ސްކޮލާޝިޕްގެ ދަށުން މެކޭނިކަލް އިންޖިނިއަރިން ކޯހުގައި ބައިވެރިވުމުގެ ފުރުސަތު ހުޅުވާލައިފިއެވެ.
އެސްޓީއޯ އިން ބުނީ، މެކޭނިކަލް އިންޖިނިއަރިން ދާއިރާއިން ކުރިއަށް ދާން ބޭނުންވާ ފަރާތަތަކަށް ހާއްސަ ފުރުސަތެއް ހުޅުވާލާ ކަމަށެވެ. އަދި އެ ކެރިއާއިން ކުރިއަށް ދާން ބޭނުންވާ ފަރާތަކަށް މި ކޯހުގައި ބައިވެރިވާން ބޭނުންވާ މީހުން ކޯހަށް އެދި މިހާރު ހުށަހެޅޭނެ ކަމަށެވެ. އެގޮތުން ފޯމް ހުށަހެޅުމުގެ ސުން ގަޑިއަކީ މި މަހުގެ 23 ވާ ބުރާސްފަތު ދުވަސް ކަމަށް އެސްޓީއޯ އިން ބުނެއެވެ.
މިއީ ބެޗްލާސް އޮފް މެކޭނިކަލް އިންޖިނިއަރިން ކޯހެއް ކަމަށާއި ކޯހުގައި ހިންގާ ކުލާސްތައް ކުރިއަށް ގެންދިއުމަށް ހަމަޖެހިފައި ވަނީ "ފޭސް ޓު ފޭސް" ކޮށް ކަމަށް އެސްޓީއޯ އިން ބުނެއެވެ. ޖެނުއަރީ މަހުގައި ފަށާ ގޮތަށް ހަމަޖެހިފައިވާ މި ކޯހަކީ 4 އަހަރުގެ މުއްދަތަކަށް ކުރިއަށް ގެންދާ ކޯހެކެވެ. އަދި މި ކޯސް ކުރިއަށް ގެންދާނީ މާލޭގައި ހުންނަ ވިލާ ކޮލެޖުގައި ކަމަށް ވެސް އެސްޓީއޯ އިން ބުނެއެވެ.
މި ކޯސް ފުރިހަމަ ކުރާ ދަރިވަރުން ބޮންޑެއްގެ ގޮތުގައި ކިޔަވައި ނިންމުމަށް ފަހު އެސްޓީއޯގެ ލޮޖިސްޓިކްސް ޑިޕާޓްމަންޓުގައި މަސައްކަތް ކުރަން ޖެހޭނެ ކަމަށް އެސްޓީއޯ އިން ބުނެއެވެ.
މި ކޯހަށް ފޯމް ހުށަހަޅާ މީހުންގެ ޝަރުތަކީ އޭލެވެލް އިމްތިހާނުގެ ދެ މާއްދާއިން "އޭ" ފާސް ލިބިފައި ވުމެވެ. "އޭ" ފާސް ލިބޭ މާއްދާތަކުގެ ތެރޭގައި ހިސާބާއި ފިސިކްސް މާއްދާ ހިމެނެން ޖެހޭނެއެވެ. ނުވަތަ އޭލެވެލް އަށް ވުރެ މަތީ ފާހެއް ލިބިފައިވާ ނަމަވެސް މި ކޯހަށް ފޯމް ހުށަހެޅި ދާނެއެވެ.
މި ސްކޮލަޝިޕާ ގުޅޭ ގޮތުން އިތުރު މައުލޫމާތު ސާފުކުރާ ނަމަ އެސްޓީއޯގެ ނަންބަރު 3344282 އަށް ގުޅައިގެން ކުރިއަށް ގެންދެވޭނެއެވެ.
