ރައްޔިތުންގެ މަޖިލީހުގެ މެމްބަރުންގެ ރަށްޓެހިންނަށް އެއާޕޯޓުގެ ވީއައިޕީ ލޯންޖުގެ ހިދުމަތް ހުޅުވާލުމާ ރިޔާސަތުން ދެކޮޅު ކަމަށް، މަޖިލީހުގެ އިދާރާއިން ބުނެފިއެވެ.
މަޖިލީހުގެ އާންމު ކޮމިޓީން އިއްޔެ ބޭއްވި ސިއްރު ބައްދަލުވުމެއްގަ ވަނީ މެމްބަރުންގެ އާއިލާގެ އިތުރުން، އިތުރު ދެ ރަށްޓެހިންނަށްވެސް ވީއައިޕީ ލޯންޖުގެ ހިދުމަތް ހުޅުވާލުމަށް ނިންމާފައެވެ. ނަމަވެސް އެ ނިންމުން އަދި ފާހެއް ނުކުރެއެވެ.
މިކަމާ ގުޅިގެން އާންމުންގެ އިތުރުން މަޖިލީހުގެ ބައެއް މެމްބަރުންވެސް ވަނީ އާންމު ކޮމިޓީއަށް ފާޑުކިއުންތައް އަމާޒު ކޮށްފައެވެ.
މަޖިލީހުގެ އާންމު ކޮމިޓީގައި ހިމެނި ވަޑައިގަންނަވާ މެމްބަރުން
- ހަސަން ލަތީފް (ހެންވޭރު ހުޅަނގު ދާއިރާ) - މުގައްރިރު
- ހަސަން ޝިޔާން (ތޮއްޑޫ ދާއިރާ) - ނައިބު މުގައްރިރު
- އާދަމް އަލީ (މާފަންނު ދެކުނު ދާއިރާ)
- މުހައްމަދު ޝާހިދު (ފުނަދޫ ދާއިރާ)
- މުހައްމަދު ރަޝީދު ހުސައިން (އަލިފުށި ދާއިރާ)
- އަބްދުލްޣަނީ އަބްދުލްހަކީމް (ކުރެންދޫ ދާއިރާ)
- މުހައްމަދު ރަޝީދު (ފުވައްމުލަކު އުތުރު ދާއިރާ)
- މުހައްމަދު މުމްތާޒް (ފުވައްމުލަކު ދެކުނު ދާއިރާ)
"ދަ ޕްރެސް" އަށް މަޖިލީހުގެ ކޮމިއުނިކޭޝަންސް ޑިރެކްޓަރު ހަސަން ޒިޔާއު، ނައިބު ރައީސް އީވާ އަބްދުﷲ އާ ހަވާލާ ދެއްވާ ވިދާޅުވީ މިކަމުގެ ސަބަބުން މަޖިލީހުގެ ބަޖެޓަށް އަސަރު ކުރާނެތީ، ރިޔާސަތުން އާންމު ކޮމިޓީގެ މި ނިންމުމާ ދެކޮޅު ކަމަށެވެ.
ރިޔާސަތުން ބޭނުންވަނީ 19 ވަނަ މަޖިލީހުން ނިންމި ނިންމުމާ އެއްގޮތަށް ވީއައިޕީ ލޯންޖުގެ ހިދުމަތް ކުރިއަށް ގެންދެވޭ ގޮތަށް ބޭއްވުން ކަމަށާ، އާންމު ކޮމިޓީގެ މެމްބަރުންނާ އީވާ މަޝްވަރާ ކުރަން ނިންމަވާފައިވާ ކަމަށްވެސް ޒިޔާއު ވިދާޅުވިއެވެ.
މިކަމާ ގުޅިގެން ވިލިމާލެ ދާރިއާގެ މަޖިލީސް މެންބަރު އަހުމަދު އުޝާމް ވިދާޅުވީ، މި ނިންމުމަކީ މުޅި މަޖިލީހުން ނިންމާފައިވާ ނިންމުމެއް ނޫން ކަމަށާއި މިއީ އާންމު ކޮމިޓީގައި ތިބޭ އެއް ޕާޓީއަކަށް ނިސްބަތްވާ 8 މެންބަރުންގެ ނިންމުމެއް ކަމަށެވެ. އަދި މަޖިލީހުގެ އެހެން ގިނަ މެންބަރުންނަށް މިކަން އެނގުނީވެސް ނޫސްތަކުގައި އެހަބަރު ލިޔުމުން ކަމަށާއި މިކަމަށް ތާއީދުނުކުރާ ކަމަށް ވެސް މެންބަރު އުޝާމް ވިދާޅުވިއެވެ.
މީގެ ކުރިން މަޖިލިސް މެމްބަރުންނަށް ވީއައިޕީ ލޯންުގެ ހިދުމަތް ބޭނުން ކުރުމުގަ ވަކި ހައްދުތަކެއް ކަނޑައެޅިފަ ނެތަސް، 19 ވަނަ މަޖިލީހުން ވަނީ ވީއައިޕީ ލޯންޖުން ހަމައެކަނި މެމްބަރުންގެ އާއިލާއަށް ހިދުމަތް ދެވޭ ގޮތަށް ބަދަލު ގެނެސްފައެވެ.
