ފުލުހުންނަށް ހުށަހަޅާ މައްސަލަތައް ތަހުގީގު ކުރުމުގައި ބޭނުންކުރާ ހާއްސަ އުކުޅުތަކާ ބެހޭ ގަވާއިދުގެ ސަބަބުން، އާންމުންނަށް ގާނޫނުއަސާސީން ލިބޭ ބައެއް ހައްގުތަކަށް ހުރަސްއެޅޭ ކަމަށް ބުނެ، އެ ގަވާއިދު މުރާޖައާ ކުރަން ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.
މިދިޔަ މަހުގެ 30 ގައި އާންމު ކުރި އެ ގަވާއިދުގެ ދަށުން، ގައުމީ ސަލާމަތާ ގުޅުން ހުރި ކަންކަމާއި، ޖިނާއީ ކުށްތަކުގެ މައްސަލަތަކުގައި ތުހުމަތު ކުރެވޭ ފަރާތްތައް އުޅޭ ނޫޅޭގޮތް ބަލާ ސިއްރުން މޮނީޓާ ކުރުމުގެ ބާރު ފުލުހުންނަށް ލިބޭނެއެވެ. އެގޮތުން ކެމެރާ ފަދަ ވަސީލަތްތައް ހަރުކޮށްގެން އެކަން ކުރުމުގެ ބާރު ފުލުހުންނަށް ލިބޭނެއެވެ. ނަމަވެސް ފުލުހުންނަށް މިގޮތަށް އަމަލު ކުރެވޭނީ ކޯޓު އަމުރެއްގެ ދަށުންނެވެ.
އެ ގަވާއިދުގައިވާ ގޮތުން އެފަދަ ބާރުތައް ބޭނުން ކުރުމުގައި ފުލުހުން އަމަލުކުރާ ގޮތް ބެލުމަށް ހާއްސަ ކޮމެޓީއަކަށް ހުށަހަޅާނެއެވެ. އެގޮތުން މީހަކާ ދެކޮޅަށް އެފަދަ އޮޕަރޭޝަނެއް ހިންގާ ކަމަށް ޝައްކު ކުރެވޭ ނަމަ، އެ ކޮމެޓީއަށް އެ މީހަކަށް އެ ޝަކުވާ ހުށަހެޅިދާނެއެވެ. އަދި އެ ފުލުހުން އެ ބާރުގެ ބޭނުން ކުރަނީ ގާނޫނާ އެއްގޮތަށް ކަން ނުވަތަ ނޫންކަން ނިންމުމާއި އޮޕަރޭޝަން ހުއްޓާލަން އެންގުމުގެ ބާރު ވެސް އެ ކޮމެޓީއަށް އޮންނާނެއެވެ.
މަޖިލީހަށް މި މައްސަލަ ހުށަހެޅުއްވުމަށް ފަހު، މާވަށު ދާއިރާގެ މެމްބަރު މުހައްމަދު ސައީދު ވިދާޅުވީ ފުލުހުންނަށް މި ގަވާއިދުގެ ދަށުން ދީފައިވާ ބާރުގެ ސަބަބުން އާންމުންގެ މިނިވަންކަމަށް ހުރަސްއެޅިގެން ދާ ކަމަށެވެ.
އެގޮތުން، މި ގަވާއިދުގެ ސަބަބުން އާންމުންގެ ޒާތީ ދިރިއުޅުމަށް ހުރަސްއެޅޭ ކަމަށާއި، ގާނޫނުއަސާސީން އާންމުންނަށް ލިބޭ ހައްގުތަކަކީ ނިގުޅައިގަނެވޭނެ ހައްގުތަކެއް ނޫން ކަމަށް ސައީދު ވިދާޅުވިއެވެ. އެހެންކަމުން މި ގަވާއިދު އަލުން މުރާޖައާ ކުރުމަށް މަޖިލީހަށް މައްސަލަ ހުށަހަޅުއްވަން ނިންމެވީ ކަމަށް ސައީދު ވިދާޅުވިއެވެ.
ނަމަވެސް ސައީދު ހުށަހެޅުއްވި މައްސަލައަށް ބަހުސްކުރަން ނުފެންނަ ކަމަށް ވޯޓުދީ، އެ މައްސަލަ ވަނީ މަޖިލީހުން ބޭރުކޮށްލާފައެވެ.
