ކުރީގެ ޖެންޑާ މިނިސްޓަރު ޝިދާތާ ޝަރީފް އަދި އަދާލަތު ޕާޓީގެ ހާރިޖީ ގުޅުންތަކާ ބެހޭ ކޮމެޓީގެ ރައީސް އެޕާޓީން ވަކިވެވަޑައިގެންފައި ވާއިރު އޭނާ ސޮއިކުރައްވަނީ ކުރީގެ ޑިފެންސް މިނިސްޓަރު އަދި ދަނގެތި ދާއިރާގެ މެމްބަރު މުހައްމަދު ނާޒިމް ޕާޓީ މޯލްޑިވްސް ނޭޝަނަލް ޕާޓީ (އެމްއެންޕީ) އަށް ކަމަށް ވިދާޅުވެއްޖެއެވެ.
ޝިދާތާ މިއަދު ނެރުއްވި ބަޔާނެއްގައި ވިދާޅުވީ ސިޔާސީ ފުރަތަމަ ފިޔަވަޅާއެކު މިހާތަނަށް އުކަމުން ދިޔަ އެންމެހާ ސިޔާސީ ސޮފްހާތައް އުކަމުން ދިޔައީ އަދާލަތު ޕާޓީ އާއެކު ކަމަށް ވާތީ ގިނަ ގުނަ ތަޖުރިބާތަކެއް ކުރުމުގެ ފުރުސަތު ލިބިވަޑައިގެންފައި ވާ ކަމަށެވެ.
ޝިދާތާ ވިދާޅުވީ އެމްއެންޕީއާ ގުޅިވަޑައިގަތުމަށް ނިންމެވީ ރައްޔިތުންގެ ހައްގުގައި ފުޅާ ދާއިރާއެއްގެ އިތުރު މަސައްކަތްތަކެއް ކުރެވިގެން ދާނެކަމަށް ގަބޫލުކުރެވޭތީ ކަމަށެވެ. އަދި ރައްޔިތުން އެދޭފަދަ މިސްރާބަކަށް ގައުމުގެ ކަންކަން ގެންދިއުމަށް ކުރެވޭ މަސައްކަތައް ބޮޅެއް އިތުރުވެގެން ދާނެކަމަށްވެސް ވިދާޅުވިއެވެ.
އަދާލަތު ޕާޓީން ޝިދާތާ ވަކިވެވަޑައިގެންފައި ވަނީ އެ ޕާޓީން އާ އެކްޝަން ޕްލޭނެއް އެކުލަވާލަން ނިންމާ އެކަމަށް ނެގި ހާއްސަ ކޮމެޓީގައިވެސް ޝިދާތާ ހިމަނާފައި ވަނިކޮށެވެ.
ޝިދާތާ އަކީ މި ސަރުކާރުގެ ފުރަތަމަ ޖެންޑާމިނިސްޓަރެވެ. ނަމަވެސް މަގާމުގެ މަސްއޫލިއްޔަތު އަދާ ކުރުމުގައި ނުކުޅެދިފައިވާ ކަމަށް ބުނެ އެކިއެކި ތުހުމަތުތައް ކުރައްވައި ޝިދާތާގެ އިތުބާރު ނެތް ކަމުގެ ވޯޓެއް ނަގާނެ ކަމުގެ އިންޒާރު އެމްޑީޕީގެ ޕީޖީ ގްރޫޕުން ދެއްވުމާއި ގުޅިގެން އޭނާ ވަނީ އަމިއްލައަށް އެމަގާމުން އިސްތިއުފާ ދެއްވާފައެވެ.
ތިޔާ ހަބަރުޖަހާވަރުގެ ކަމެންނޫން