އަންނަ އޮކްޓޯބަރު މަހު އިނގިރޭސިވިލާތުގެ ގްލެސްގޯގައި ބާއްވާ މޫސުމީ ބަދަލުތަކާ ބެހޭ ބައިނަލްއަގްވާމީ ބައްދަލުން، ކޮޕް 26 ގެ ރިޔާސަތު ބަލަހައްޓަވާ އިނގިރޭސިވިލާތުގެ އަލޮކް ޝަރްމާ (އެމްޕީ) އާއި ފޮރިން މިނިސްޓަރު އަބްދުﷲ ޝާހިދު ބައްދަލުކުރައްވައިފިއެވެ.
ލަންޑަންގައި ބޭއްވި އެ ބައްދަލުކުރެއްވުމުގައި އދގެ އާއްމު މަޖިލީހުގެ 76 ވަނަ ދައުރުގައި ރިޔާސަތުން އިސްކަން ދެއްވާނެ ކަންތައްތަކާ ގުޅޭ ގޮތުންނާ، ކޮޕް 26 އަށް ތައްޔާރުވުމަށް ދިވެހިރާއްޖެއިން ކުރަމުންދާ މަސައްކަތާ ބެހޭ މައުލޫމާތު ޝާހިދު އަލޮކް ޝަރްމާއަށް އަރުވާފައިވާ ކަމަށް ފޮރިން މިނިސްޓްރީން ބުނެއެވެ.
އަދި މޫސުމީ ބަދަލިތަކާ، ދުނިޔެއަށް ބޭނުންވާ މުހިއްމު ކަންތައްތަކަކީ ޝާހިދު އދގެ އާއްމު މަޖިލީހުގެ ރިޔާސަތު ބަލަހައްޓަވާއިރު އިސްކަން ދެއްވާނެ މުހިއްމު ބައެއް ކަންތައްތަކެއް ކަމަށް ވެސް މިނިސްޓްރީން ބުނެއެވެ.
އޭގެ އިތުރުން ޝާހިދު ވަނީ ސައޫދީ އަރަބިއްޔާގެ ހާރިޖީ ވަޒީރު އަމީރް ފައިސަލް ބިން ފަރްހާން އާ ފޯނުން ގުޅުއްވާ މަޝްވަރާކުރައްވާފައިވާ ކަމަށް ވެސް މިނިސްޓްރީން ވަނީ ބުނެފައެވެ.
އެގޮތުން ދެގައުމުގެ ދެމެދުގައި އޮންނަ ގުޅުމާ ބެހޭ ގޮތުންނާ، ސަރަހައްދީ އަދި ބައިނަލްއަގްވާމީ މައްސަލަތަކާ ބެހޭ ގޮތުން މަޝްވަރާކުރައްވާފައިވާ ކަމަށް މިނިސްޓްރީން ފާހަގަކުރެއްވިއެވެ.
