ހދ. ކުޅުދުއްފުށީ ރީޖަނަލް ހޮސްޕިޓަލް ބޮޑުކޮށް މަރާމާތުކުރުމުގެ މަޝްރޫއުގެ މަސައްކަތުގެ 67 ޕަސެންޓް ނިމިއްޖެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
އެމްޓީސީސީން ބުނީ މިމަޝްރޫއުގެ ދަށުން ލިފްޓު ހަރުކުރުމުގެ މަސައްކަތް މިހާރު ނިމި ހިނގާ ސަރަހައްދުގެ މަސައްކަތުގެ 75 ޕަސެންޓް ނިމިފައިވާ ކަމަށެވެ.
ކުޅުދުއްފުށީފައި އަޅާ އާ ވޯޑް ޕްރޮޖެކްޓްގައި ހިމެނެނީ 30 އެނދުގެ ވޯޑް އިމާރާތެއް އެޅުމާއި (ދެ ބުރިއަށް)، އޯޕީޑީ ސަރަހައްދު މަރާމާތު ކުރުމާއި، ހޮސްޕިޓަލުގެ މައި އިމާރާތާއި އޮފީސް އިމާރާތާއި އުފަން ހިޔާ އިމާރާތް ވޯކްވޭއަކުން ގުޅުވާލުމުގެ އިތުރުން ލެބޯޓަރީ އަޕްގްރޭޑް ކުރުމަށްޓަކައި އުފަން ހިޔާއަށް ބަދަލު ކުރުމެވެ.
މިނިސްޓްރީ އޮފް ހެލްތުގެ ފަރާތުން އެމްޓީސީސީއާ މި މަޝްރޫއު ހަވާލުކޮށް ސޮއި ކުރެވުނީ މިދިޔަ އަހަރުގެ ނޮވެންބަރު 14 ގައެވެ. އަދި މި މަޝްރޫއު ފަށާފައި ވަނީ މިދިޔަ މޭ މަހުގެ 17 ގައެވެ. މަޝްރޫއު ނިންމުމަށް ދީފައިވާ މުއްދަތަކީ މޮބިލައިޒޭޝަން ތާރީހުން ފެށިގެން ހަ މަސް ދުވަހެވެ. ހަ މަސް ދުވަހުން ނިންމަން ޖެހޭ ގޮތަށް އެމްޓީސީސީއާ ހަވާލުކުރި މި މަޝްރޫއުގެ އަގަކީ 30,317,922.24 ރުފިޔާއެވެ.
