އެމްއެމްޕީއާރްސީ ހިޔާނާތުގެ މައްސަލައިގައި ޕީޖީ ތެރޭގައި ގޯސްތަކެއް ހުރުމުން ދައުވާ ކުރިއަސް މަގާމުން އިސްތިއުފާ ދެއްވުމާ މެދު އަލުން ވިސްނަވަން ނިންމަވާފައިވާ ކަމަށާއި އޭނާ މަގާމުން ވަކިކުރެއްވޭނީ ރައީސް އިބްރާހިމް މުހައްމަދު ސޯލިހަށް ކަމަށް ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެއެވެ.
މަހްލޫފް މިހެން ވިދާޅުވީ، އޭނާގެ މައްސަލަ ދިރާސާ ކުރުމަށް ޕްރޮސެކިއުޓަރު ޖެނެރަލްގެ އޮފީހުގައި އެކުލަވާލާފައި އޮތް ދައުލަތުގެ ޕްރޮސެކިއުޓަރުންގެ ކޮމިޓީން ބަލަމުން ގެންދަނިކޮށް އެ މައްސަލަ އަބްދުﷲ ރާބިއު އާއި މަހްމޫދު ސަލީމްއާ ހަވާލުކޮށްފައިވާ ކަމަށް އޮންލައިން ނޫހެއްގައި ރިޕޯޓްކުރުމުންނެވެ.
މަހްލޫފް ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމާ އެކު އިސްތިއުފާ ދެއްވަން ކަމަށެވެ. ނަމަވެސް ޕީޖީ އޮފީސް ތެރޭގައި ކަންކަން ގޯސްކޮށް ނިންމަމުން ދާތީ ފަސޭހައިން މަގު ކޮށައި ދެއްވަން ބޭނުން ނުވާ ކަމަށާއި އެގޮތުން އިސްތިއުފާ ދެއްވުމަށް ނިންމެވި ނިންމެވުމާ މެދު އަލުން ވިސްނަވަން ނިންމަވާފައިވާ ކަމަށް މަހްލޫފް ވިދާޅުވިއެވެ. އެއްބަޔަކު ހަޑިކޮށް ކުޅޭ އިރު ފަސޭހަކޮށް އެ މަގު ކޮށައިދޭން ބޭނުންވެވަޑައި ނުގަންނަވާ ކަމަށް މަހްލޫފް ވިދާޅުވިއެވެ.
މި ވާހަކަތައް ރަސްމީކޮށް ރައީސް ސޯލިހަށް ދަންނަވާނެ ކަމަށް މަހްލޫފް ވިދާޅުވިއެވެ. އަދި އޭނާ މަގާމުން ވަކި ކުރުމަކީ ރައީސަށް ގާނޫނުއަސާސީން ލިބިފައިވާ ބާރެއް ކަމުން، އޭނާ މަގާމުން ވަކިކުރުމާ މެދު ގޮތެއް ނިންމަވާނީ ރައީސް ކަމަށް މަހްލޫފް ވިދާޅުވިއެވެ.
މި މައްސަލައިގައި ގިނަވެގެން 6 ދުވަސްތެރޭ ދައުވާކުރުމާ މެދު ގޮތެއް ނިންމާނެ ކަމަށް ޕީޖީ ހުސައިން ޝަމީމް ކުރިން ވިދާޅުވި ނަމަވެސް އޭނާގެ މައްސަލައިގައި ވަކި ގޮތެއް ނުނިންމާ އޮންނަތާ މިހާރު 60 ދުވަސްވެފައިވާ ކަމަށް މަހްލޫފް ވިދާޅުވިއެވެ. އަދި މިހާރު އެހެން ބަޔަކާ އެ މައްސަލަ ހަވާލުކޮށްފައި ވަނީ އެމްއެމްޕީއާރުސީގެ މައްސަލަތައް ނިންމާ ކޮމިޓީން ދައުވާ ނުކުރެވޭނެ ކަމަށް ބުނުމުން ކަމަށް މަހްލޫފް ވިދާޅުވިއެވެ.
ނުފޫޒު ގަދަ ސިޔާސީ ބަޔަކު އެ މައްސަލައިގެ ތެރެއަށް ވަދެފައިވާ ކަމަށާއި އެއީ ޒާތީ ކަމެއް ކަމަށް އޭނާ ވިދާޅުވިއެވެ. އޭނާގެ މައްޗަށް ދައުވާކުރިޔަސް ކޯޓުގެ ތެރެއިން އެކަން ހާމަވާނެ ކަމަށާއި، ދެ އަހަރު ކުރިން ގާނޫނީ ވަކީލަކު ފޮނުވި ޗެޓްލޮގެއް އަދިވެސް އޭނާގެ އަތުގައި އެބައޮތް ކަމަށާއި އެ ޗެޓްލޮގްގައި އޭނާ ދެއްކި ކަމަށް ބުނާ ވާހަކައެއް ނެތް ކަމަށް ވެސް މަހްލޫފް ވިދާޅުވިއެވެ.
އިތުރަށް ކަންކަން ހިނގާފައިވާ ގޮތް ތަފްސީލް ކޮށްދެއްވަމުން މަހްލޫފް ވިދާޅުވީ، އެ މައްސަލައާ ގުޅޭ ގޮތުން ލަންކާގެ ރައްޔިތެއްގެ ބަޔާން ނަގާފައިވާ ކަމަށާއި އެކަން ކޮށްފައި ވަނީ ރާއްޖޭގެ ގާނޫނުތަކާއި ލަންކާގެ ގާނޫނުތަކާ ހިލާފަށް ކަމަށް ވެސް މަހްލޫފް ވިދާޅުވިއެވެ. އަދި މިހާރު ލަންކާގެ ކަމާ ބެހޭ ފަރާތްތަކުން އެ މައްސަލަ ބަލަމުން ގެންދާ ކަމަށާއި ރާއްޖޭގެ ފޮރިން މިނިސްޓްރީން ވެސް އެ މައްސަލަ ބަލަމުން އަންނަ ކަމަށް މަހްލޫފް ވިދާޅުވިއެވެ.
އެމްއެމްޕީއާރްސީ ހިޔާނާތުގައި ބައިވެރިވި މީހުންގެ ލިސްޓު އާންމުކުރި އިރު އެ ލިސްޓުގައި މި ސަރުކާރުގެ މިހާރު ތިބި ވަޒީރުންގެ ތެރެއިން ނަން އޮތީ މަހްލޫފްގެ އެކަންޏެވެ. އެމްއެމްޕީއާރްސީގެ ހިޔާނާތުގެ ލިސްޓުގައި ހިމެނިވަޑައިގެންނެވި ދައުލަތުގެ އިސް މަގާމުތަކުގައި ތިއްބެވި ބޭފުޅުންގެ މައްސަލަ ކޯޓަށް ފޮނުވާ ހިސާބުން އެ ބޭފުޅުން މަގާމުން ވަކިކުރައްވަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ނިންމަވާފައިވާ ކަމަށް ރައީސް އޮފީހުން ވަނީ މީގެ ކުރިން ބުނެފައެވެ.
އެސްއޯއެފްއާ އެކު ޑޮލަރުގެ މުއާމަލާތެއް ހިންގާފައިވާކަން އެނގުމުން، މަހްލޫފް ސަސްޕެންޑް ކުރީ ފެބްރުއަރީ 14، 2019 ގައެވެ. އެންޓި ކޮރަޕްޝަން ކޮމިޝަން (އޭސީސީ) ގައި މަހްލޫފްގެ މައްސަލައެއް ނެތުމާއި ބަލަން ޖެހޭ އިތުރު ކަންކަމަށް ބެލުމަށް ފަހު، މަހްލޫފްގެ ސަސްޕެންޝަން އުވާލީ، އޭގެ ދެ މަސް ފަހުން އޭޕްރިލް 16، 2019 ގައެވެ. ނަމަވެސް އެސްއޯއެފުން ޑޮލަރު ޖަމާކުރި ފަރާތްތަކުގެ ތަފްސީލު ހިމެނޭ ރިޕޯޓް އޭސީސީން ނެރުމުން، މަހުލޫފްގެ މުއާމަލާތެއް ވެސް އޭގައި ހިމެނޭތީ އޭނާ ވަނީ އަނެއްކާ ސަސްޕެންޑް ކޮށްފައެވެ.
މިކަމާ ގުޅިގެން މަހުލޫފް ވިދާޅުވެފައި ވަނީ އޭނާގެ އެކައުންޓަށް 33،000 ޑޮލަރު ވަދެފައި ވަނީ، ޑޮލަރު ގަތުމަށް ހިންގެވި ސައްހަ މުއާމަލާތެއްގެ ތެރެއިން ކަމަށެވެ.
