މީހަކު ދެކެ ސިޔާސީ ގޮތުން ހިޔާލު ތަފާތު ވިޔަސް ދޮގުވާހަކަތައް ދައްކައި ނަފްރަތު އުފެއްދުމަކީ ބަލައިގަނެވޭނެ ކަމެއް ނޫން ކަމަށް ކުރީގެ އިސްލާމިކް މިނިސްޓަރު އަދި ދިވެހިރާއްޖޭގެ އިސްލާމީ ޔުނިވާސިޓީގެ ކުރީގެ ޗާންސެލާ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޝަހީމް މިފަދައިން ވިދާޅުވީ ދާދިފަހުން ސަންގުޓީވީގެ "ހަބަރަށް ފަހު" ޕްރޮގްރާމްގައި ވާހަކަ ދައްކަވަމުން ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ރައީސް އަބްދުﷲ ޔާމީން އަކީ "އައިސިސް ދިދަނަގައިން މުޒާހަރާ ކުރުވި" ބޭފުޅެއް ކަމަށް ވިދާޅުވުމާ ގުޅިގެންނެވެ.
ޝަހީމް ވިދާޅުވީ އިސްލާމްދީނުގެ ރީތި ތަސައްވުރާއި ތަހުޒީބު ވިސްނުމުގެ މައްޗަށް އިޖުތިމާއީ ވެށި ބިނާކުރަން ރައީސް ޔާމީން ވަރަށް މަސައްކަތްކުރެއްވި ކަމަށެވެ.
ރޮޒައިނާގެ ވާހަކަތައް ޝަހީމް ކުއްވެރި ކުރެއްވި އިރު، ޕީއެންސީގެ ޕާލިމަންޓަރީ ގުރޫޕްގެ ލީޑަރު މަޑުއްވަރީ ދާއިރާގެ މެމްބަރު އާދަމް ޝަރީފް އުމަަރު ވެސް ވަނީ ރޮޒައިނާ އަށް ރައްދު ދެއްވާފައެވެ. އާދަމް ޝަރީފް ވިދާޅުވީ ޓެރަރިޒަމާއި ހައްދުފަހަނައެޅުމާ ދެކޮޅަށް އެންމެ ހަރުދަނާ މަސައްކަތްތަކެއް ކުރެއްވީ ރައީސް ޔާމީނު ކަމަށެވެ.
