މިއަދު ޖުމްލަ 139 މީހަކު ކޮވިޑަށް ޕޮޒިޓިވް ވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، ވޭތުވެ ދިޔަ 24 ގަޑިއިރުގެ ތެރޭގައި ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން 26 މީހަކާއި އަތޮޅުތެރޭގެ ރަށްރަށުން 81 މީހަކާއި މިވަގުތު ހިންގަމުން ދާ ރިސޯޓު ތަކުން 8 މީހަކާއި ލިވަ ބޯޑުން ދެ މީހަކާއި އަދި އިންޑަސްޓްރިއަލް ރަށަކުން 22 މީހެކެވެ.
ޕޮޒިޓިވްވި މީހުންނާއެކު އެކްޓިވް ކޭސް މިވަނީ 2932 އަށް ދަށްވެފައި ކަމަށް އެޗްޕީއޭއިން ބުނެއެވެ.
މިހާތަނަށް ރާއްޖެއިން ކޮވިޑް ޖެހުނު ޖުމްލަ އަދަދަކީ 74،724 އެވެ. މީހުންގެ ތެރެއިން 71،567 މީހުން މިހާތަނަށް ރަނގަޅުވެފައި ވާއިރު މަރުވި މީހުންގެ އަދަދު މިވަނީ 213 އަށް އަރާފައެވެ. އެގޮތުން މި މަހު މަރުވެފައި ވަނީ 52 މީހެކެވެ.
ކޮވިޑުން ރައްކާތެރިވުމަށް މެއި މަހު އަޅާފައިވާ ހަރުކަށި ފިޔަަވަޅުތަކަށް މިހާރު ވަނި ލުއި ދީފައެވެ. އެ ގޮތުން މާދަމާ އިން ފެށިގެން މާލެ، ވިލިމާލެ އަދި ހުޅުމާލޭގައި ހިންގަމުންދާ ކާފިއު އުވާލާ ގޮތަށް ވަނީ ނިންމާފައެވެ.
އަދި ރެސްޓޯރަންޓްތަކުން ރޭގަނޑު 11:30 ވަންދެން އާންމުންނަށް "ޑައިން އިން" ހިދުމަތް ދެވޭ ގޮތަށް ވަނީ ނިންމާފައެވެ. ހަމައެއާއެކު ވިޔަފާރި ކުރާ ތަންތަނަށް ވެސް އާންމުންނަށް ވަދެވޭ ގަޑި ވަނީ އިތުރު ކޮށްފައެވެ.
މީގެ އިތުރުން އެޗްޕީއޭއިން އާންމުކުރާ އުސޫލުތަކާ އެއްގޮތަށް 30 މީހުންނަށް ވުރެ އިތުރު ނުވާ ގޮތަށް ޕާޓީއާއި ހަފްލާތަކާއި އެއްވުންތައް ބޭއްވޭ ގޮތަށް ވެސް ވަނީ ހަމަޖައްސާފައެވެ.
