އއ. ހިމަންދޫ ގޮނޑުދޮށުން މިނި ކަށިތަކެއް ފެނިއްޖެއެވެ.
ހިމަންދޫގެ ހުޅަނގު ކޮޅު ގިރަމުންދާ ސަރަހައްދުން ފެނިފައިވަނީ 3 މީހެއްގެ ބޮލުގެ ނާށިގަނޑާއެކު ކަށިތަކެވެ.
"ދަ ޕްރެސް" އަށް މައުލޫމާތު ދެއްވަމުން ހިމަންދޫ ކައުންސިލްގެ ރައީސް ހުޝާމް އިސްމާއިލް ވިދާޅުވީ މީގެ 4 ވަރަކަށް އަހަރު ކުރިންވެސް އެ ހިސާބާ މާދުރުނޫން ހިސާބަކުން މިނި ކަށިތަކެއް ފެނިފައިވާ ކަމަށެވެ.
އަދި އެހިސާބަކީ މީހުން ވަޅުލާ ހިސާބެއްކަމަށް ފާހަގަކުރެވިފައިވާ ހިސާބެއް ނޫން ކަމަށާ، ރަށުގެ ދުވަސްވީ މީހުންގެ ފަރާތުން އެނގިފައިވާ ގޮތުންވެސް އެހިސާބުގައި ކުރިން މީހުން ވަޅުލާފައި ނުވާކަމަށް ހުޝާމް ވިދާޅުވިއެވެ.
ހުޝާމް އިތުރަށް ވިދާޅުވީ އިއްޔެގައި ކުރެވުނު މަސައްކަތުން އެކެއްގެ ކަށިތައް ނަގައި ގަބުރުސްތާނުގައި ވަޅުލަފައިވާ ކަމަށެވެ. އަދި މި މަސައްކަތުގައި ފުލުހުންވެސް ހަރަކާތްތެރިވެފައިވާކަމަށް ހުޝާމް ވިދާޅުވިއެވެ.
މީގެ އިތުރުން އެއަތޮޅު ރަސްދޫ ޕޮލިސް ސްޓޭޝަނުން ފުލުހުން އައިސް އެ ކަށިތަކުގެ ސާމްޕަލްވެސް ނަގައިފައިވާ ކަމަށް ކައުންސިލް ރައީސް ވިދާޅުވިއެވެ.
