އެމްޓީސީސީއަށް މިދިޔައަހަރު ލިބުނު ފައިދާއިން އެކުންފުނީގެ ކޮންމެ ހިއްސާއަކަށް 3 ރުފިޔާ ބަހަން ނިންމައިފިއެވެ.
ހިއްސާއަކަށް 3 ރުފިޔާ ބަހަން ނިންމާފައިވަނީ މިއަދު އޮންލައިންކޮށް ކުރިޔަށްދިޔަ އެމްޓީސީގެ އަހަރީ އާންމު ޖަލްސާގައި ބައިވެރިވި ހިއްސާދާރުންގެ 86.1 ޕަސެންޓު ވޯޓުންނެވެ. މި ހިއްސާގެ ފައިސާ ލިބޭ ފަރާތްތަކަށް ކުރިޔަށް އޮތް 30 ދުވަހުގެ ތެރޭގައި ބަހާނެކަމަށް އެމްޓީސީސީން ބުނެއެވެ.
2020 ވަނަ އަހަރަކީ އެމްޓީސީސީއަށް އެންމެ ކާމިޔާބު އަހަރު ކަމުގައި އެ ކުންފުނިން ފާހަގަކުރެއެވެ. އެގޮތުން 2020 ވަނަ އަހަރު އެ ކުންފުންޏަށް 1.337 ބިލިއަން ރުފިޔާގެ ފައިދާ ލިބިފައިވާކަމަށް އެކުންފުނިން ބުނެއެވެ. އެއީ 2019 ވަނަ އަހަރާ އަޅާ ބަލާއިރު 19 ޕަސެންޓުގެ ކުރިއެކުމެކެވެ.
ޓެކްސް ފައިސާގެ ކުރިން 224.72 މިލިއަން ރުފިޔާ ލިބިފައިވާއިރު 2019 ވަނަ އަހަރާ އަޅާބަލާއިރު 253 ޕަސެންޓުގެ ކުރިއެރުމެއްކަމަށް އެކުންފުނިން ބުނެއެވެ. 2020 ވަނަ އަހަރު ލިބުނު ފައިދާއިން 23.72 ރުފިޔާ ކޮންމެ ހިއްސާއަކަށް ޖެހޭކަމަށްވެސް އެމްޓީސީސީން ބުނެއެވެ.
2020 ވަނަ އަހަރު އެމްޓީސީސީން ޖުމުލަ 36 މަޝްރޫއެއް ހިންގާފައިވާއިރު އެންމެ ކާމިޔާބުކަމާއެކު ނިންމާލެވުނީ ހޯރަފުށީ އެއާޕޯޓުކަމަށް އެ ކުންފުނިން ބުނެއެވެ. އަދި އެއީ ބިންހެއްކުމުގެ މުއްދަތާ ލައިގެން 578 ދުވަހުން ނިންމާލެވުނު މަސައްކަތެއްކަންވެސް އެ ކުންފުނިން ފާހަގަކުރެއެވެ.
2020 ވަނަ އަހަރު ވަކިވަކި މަސައްކަތްތަކުން ލިބުނު އާމްދަނީ
- ކޮންސްޓްރަކްޝަން: 940 މިލިއަން ރުފިޔާ، 2019 ވަނަ އަހަރާ އަޅާ ބަލާއިރު 62.3 ޕަސެންޓުގެ ކުރިއެރުމެއް
- ޑްރެޖިން: 175 މިލިއަން ރުފިޔާ، 2019 ވަނަ އަހަރާ އަޅާ ބަލާއިރު 1.1 ޕަސެންޓުގެ ދަށް އަދަދެއް
- ދަތުރުފަތުރު: 51 މިލިއަން ރުފިޔާ، 2019 ވަނަ އަހަރާ އަޅާބަލާއިރު 43.33 ޕަސެންޓުގެ ދަށް އަދަދެއް.
- އާންމު ވިޔަފާރި: 180 މިލިއަން ރުފިޔާ، 2019 ވަނަ އަހަރާ އަޅާބަލާއިރު 51.6 ޕަސެންޓު ދަށް އަދަދެއް
ކުރިޔަަށް އޮތް އަހަރު ހާސިލުކުރަން ބޭނުންވާ މިންވަރު
- ޕީއައިޕީއަށް ކަނޑައަޅާފައިވާ މިންވަރު: 8.3 ބިލިއަން ރުފިޔާ
- މާލީގޮތުން 2.33 ބިލިއަން ރުފިޔާ
- ޓެކްސްގެ ކުރިން 251 މިލިއަން ރުފިޔާ
އެމްޓީސީސީގެ 2021 ވަނަ އަހަރަށް އޮޑިޓަރުން ހޮވުމަށް ހުޅުވާލުމުން 3 ކުންފުންޏަކުން ކުރިމަތިލާފައިވާއިރު އެ ކުންފުނިން ހޮވާފައިވަނީ އެންމެ ކުޑަ އުޖޫރަ ކަނޑައެޅި ކުންފުނިކަމަށްވާ ޕްރައިސްވޯޓާހައުސްކޫޕާސް އެވެ. އެ ކުންފުންޏަށް 385،500 ރުފިޔާ އެމްޓީސީސީން ދައްކަން ޖެހެއެވެ.
