ރާއްޖޭގެ މީޑިއާތަކުގެ އެޑިޓަރުން ހިމެނޭ "އެޑިޓާސް ގިލްޑް" ގެ ހިންގާ ކޮމިޓީ އިންތިހާބު ކޮށްފިއެވެ.

އެ އިންތިހާބު ބާއްވާފައި ވަނީ މިއަދު އޮންލައިން ކޮށެވެ. މިއަދު އޮތް އިންތިހާބުގައި އެ ގިލްޑް ގެ ރައީސަކަށް ހޮވުނީ "ސަން މީޑިއާ ގްރޫޕުގެ"ގެ ކުރީގެ ޗީފް އެޑިޓަރު އަހުމަދު ޒާހިރު (ހިރިގާ) އެވެ. ނައިބު ރައީސް އެކަޑެމިކް އަށް އިންތިހާބުވީ "ދަ ޕްރެސް"ގެ އެޑިޓަރު އަލީ ޝަމްއާން އެވެ، އަދި ނައިބު ރައީސް އިދާރީ އަށް އިންތިހާބު ވީ "ވަން މީޑިއާ ގްރޫޕުގެ" އޮންލައިންގެ ސީއީއޯ ސިނާން އަލީއެވެ.

އޭގެ އިތުރުން ޓްރެޝަރާ ކަމަށް "ރަސް" އޮންލައިންގެ އެޑިޓަރު މިދުހަތު އާދަމް އިންތިހާބުވި އިރު ސެކްރެޓަރީ ޖެނަރަލްގެ މަގާމަށް "މިހާރު" ނޫހުގެ އެޑިޓަރު އިސްމާއިލް ނަސީރު ވަނީ އިންތިހާބު ވެފައެވެ.

ރިޓަޔާޑް ނޫސްވެރިންގެ ގޮނޑިއަށް ދިވެހި ރާއްޖޭގެ އަޑާއި ޗެނަލް 13 އާއި އަވަސްގެ ސީއީއޯކަން ކުރެއްވި އިބްރާހީމް އުމަރު މަނިކު އަދި ޓީވީއެމް އަދި ވީޓީވީގައި ގިނަ ދުވަސްތަކެއް ވަންދެން މަސައްކަތް ކުރެއްވި މުހައްމަދު އާސިފް (މޮންދު) ވަނީ އިންތިހާބު ވެފައެވެ.

އެޑިޓާސް ގިލްޑް އަކީ ނޫސްވެރިންގެ ހައްގުތައް ހޯދައިދިނުމުގައި ޒިންމާދާރު ގޮތެއްގައި އަޑު އުފުލުމާއި މިނިވަން ނޫސްވެރިކަމެއް ދެމެހެއްޓުމަށްޓަކައި އެސޯސިއޭޝަންގެ މެންބަރުން އެއްބައިވެ ޕްރޮފެޝަނަލް ރޫހެއް އާލާ ކުރުމާ އެކު، ނޫސްވެރިންގެ ތެރޭގައި އެއްބައިވަންތަކަމާއި އެކުވެރިކަމާއި އެއްބާރުލުން އުފައްދައި އާލާކޮށް ދެމެހެއްޓުމަށް މަސައްކަތް ކުރާ ޖަމްއިއްޔާއެކެވެ.

އޭގެ އިތުރުން މައުލޫމާތު ހޯދާ ލިބިގަތުމުގައި ނޫސްވެރިންނަށް ދިމާވާ ދަތިތައް ހައްލު ކުރުމަށް އަޑު އުފުލުމާއި ނޫސްވެރިކަން ފުރިހަމަ ގޮތުގައި ކުރެވޭނެ ވެއްޓެއް ގާއިމު ކުރުމަށާއި އެވެށި ދެމެހެއްޓުމަށް ކުރަންޖެހޭ މަސައްކަތްތައް ކުރުމުގައި ނޫސްވެރިންގެ މެދުގައި އެއްބާރުލުން އުފެއްދުން ވެސް ހިމެނެއެވެ.

ހަމައެހެންމެ ކަމާ ބެހޭ ފަރާތްތަކާ ވާހަކަ ދައްކައިގެން ނޫސްވެރިންގެ ހައްގުތައް ހޯދައިދޭ ގާނޫނުތައް ހެދުވުމާއި، އެއަށް އަމަލު ކުރޭތޯ ބަލާ އަޑުއުފުލުމާއި ނޫސްވެރިންގެ ދާއިރާއިން ޕްރޮފެޝަނަލް ތަމްރީނުތަކާއި ތާޒާ ކުރުމުގެ ޕްރޮގްރާމްތައް ހިންގައި މެންބަރުންނަށް އޭގެ ފައިދާ ކުރާނެ ގޮތްތަކެއް ހޯދައިދިނުމަށް މަސައްކަތް ކުރުން ވެސް މަގުސަދުތަކުގެ ތެރޭގައި ހިމެނެއެވެ.

އަދި ބޭރު ގައުމުތަކުގެ މީޑިއާ އެސޯސިއޭޝަންތަކާއި ޕްރެސް އެސޯސިއޭޝަންތަކާ ގުޅުން އުފައްދާ އެ ގުޅުން ބަދަހި ކުރުމާއި ރާއްޖޭގެ ނޫސްވެރިކަން ކުރިއެރުވުމަށްޓަކާ އެފަދަ ޖަމާއަތްތަކުން ހޯދަން ޖެހޭ އެއްބާރުލުމާއި އެހީތެރިކަން ހޯދުން ވެސް މި އެސޯސިއޭޝަންގެ މަގްސަދުގެކެވެ.

އެޑިޓާސް ގިލްޑަކީ ރާއްޖޭގައި ނޫސްވެރިކަމުގައި މަސައްކަތް ކުރާ އެބޭފުޅުން (އެޑިޓަރުން) ހިމެނޭ ނޫސްވެރިކަމުގެ އެންމެ ސީނިއާ ބޮޑީއެވެ.

ހަބަރު ނޫސްވެރިކަން އެޑިޓާސް ގިލްޑް ދިވެހި ރާއްޖެ