އައްޑޫ ސިޓީ ގަން، ދޫގަސް ކަރަންޓީން ފެސިލިޓީއަކަށް ތައްޔާރުކުރުމުގެ މަސައްކަތް ފަށައިފިއެވެ.
އައްޑޫސިޓީ ކައުންސިލުން ބުނީ މިއީ އައްޑޫ ސިޓީގައި ކޮވިޑްގެ ހާލަތު ގޯސްވަމުންދާތި، ރައްކާތެރިކަމުގެ ގޮތުން އަޅަމުންދާ ފިޔަވަޅުތަކުގެ ތެރެއިން ކައުންސިލުން ނިންމި ފިޔަވަޅެއް ކަމަށެވެ.
އެގޮތުން ދޫގަސް، ކަރަންޓީން ފެސިލިޓީއަކަށް ހެދުމުގެ މަސައްކަތުގައި ފޭދޫ އަވަށު އޮފީސް މުވައްޒަފުން ހަރަކާތްތެރިވަމުންދާ ކަމަށް އައްޑޫ ސިޓީ ކައުންސިލުން ވަނީ ބުނެފައެވެ.
އައްޑޫއިން އިއްޔެ 20 މީހުން ކޮވިޑަށް ވަނީ ޕޮޒިޓިވް ވެފައެވެ. އެ 20 މީހުން ވެސް ޕޮޒިޓިވްވެފައިވަނީ ހިތަދޫ އިންނެވެ. ޕޮޒިޓިވްވި މީހުންގެ ތެރޭގައި 12 ދިވެހިންނާ 8 ބިދޭސީން ހިމެނެއެވެ.
އައްޑޫ އިން ޕޮޒިޓިވްވި މީހުންގެ ޖުމްލަ އަދަދު ވަނީ 368 އަށް އަރާފައެވެ. އަދި މިބަލިން ރަނގަޅުވި މީހުންގެ އަދަދު ވަނީ 292 އަށް އަރާފައެވެ.
ކޮވިޑް ކޭސްތަކެއް ފެނި އައްޑޫ ސިޓީ މޮނިޓަރިންގެ ހާލަތަށް ލާފައި ވަނީ މޭ މަހުގެ 1 ވަނަ ދުވަހުއެވެ.
