އައްޑޫސިޓީ މީދޫ ބަނދަރު ތަރައްގީކުރުމުގެ އަމަލީ މަސައްކަތް މިދިޔަ ހޯމަ ދުވަހު ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
36.5 މިލިއަން ރުފިޔާގެ މި މަޝްރޫއު އެމްޓީސީއާ ހަވާލުކޮށްފައި ވަނީ ޖޫން 23، 2019 ގައި މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާންސްޓްރަކްޗާ އިންނެވެ.
މި މަޝްރޫއުގެ ދަށުން ސ. މީދޫ ބަނދަރު ފުންކުރުމާ، ބަނދަރުގެ ނެރު ފުންކުރުމާ، 621 މީޓަރު އެއްގަމު ތޮށި ލުމާ، އެއްގަމު ތޮށި ވަށައިގެން 3،125 އަކަމީޓަރު ސަރަހައްދެއްގައި ޕޭވްމަންޓް ހެދުމާ ބަނދަރުގައި 11m x 11m ގެ ރޭމްޕް އެއް ހެދުމާ، ނެރުބައްތި ހަރުކުރުމުގެ އިތުރުން ބަނދަރު ސަރަހައްދުގައި ބައްތި ހަރުކުރުމާ، ބަނދަރުގައި މޫރިން ހުކްސް ހަރުކުރުމާ އަދި ބޮލާޑް ހަރުކުރުމުގެ މަސައްކަތް ހިމެނެއެވެ.
އެމްޓީސީސީން ބުނީ މި ބަނދަރަކީ އާންމުކޮށް ރާއްޖޭގައި ތަރައްގީ ކުރާ ބަނދަރުތަކުގެ ޑިޒއިންއާ ތަފާތު ހިތްގައިމު ބަނދަރެއް ކަމަށެވެ. އެގޮތުން މި ބަނދަރުގައި ވާ އައްސާނެ ކުޅި ތަކުގެ އިތުރުން ވާ އައްސާނެ ބޮލާޑް ވެސް ހަރުކުރެިފައިވާނޭކަމަށް އެމްޓީސީސީން ބުނެއެވެ. އަދި މި ބަނދަރު ޑިޒައިން ކުރެވިފައިވާނީ ކުރިން މީދޫގައި ދިމާވި ބޮޑުދިޔައިގައި ރަށަށް ރާޅު އެރުމުގެ މައްސަލަ ދިމާނުވާނެ ގޮތައް އުސްކޮށް ކަމަށްވެސް އެމްޓީސީސީން ބުނެއެވެ.
އެމްޓީސީސީން އައްޑޫސިޓީގެ ތަރައްގީއަށް ގިނަ މަޝްރޫއުތަކެއް ކުރިޔަށްގެންދާއިރު ހުޅުދޫ ބަނދަރު ތަރައްގީ ކުރުމާ، ހުޅުމީދޫ ބަހާއުއްދީން މަގު ހެދުމުގެ މަސައްކަތާ، ހުޅުމީދޫ މިފްކޯ ބަނދަރު ތަރައްގީ ކުރުމާ، މީދޫ ގޮނޑުދޮށް ހިމާޔަތްކުރުމުގެ އިތުރުން ހިތަދޫގެ ކުރީގެ ބަނދަރު ތަރައްގީކުރުމުގެ މަޝްރޫއު ފާހަގަކޮށްލެވެއެވެ.މި މަޝްރޫއުތަކަށް ގާތްގަނޑަކަށް 237 މިލިއަން ރުފިޔާ ހަރަދުވާނެކަމަށް ބެލެވޭއިރު މި ނޫންވެސް އިތުރު ތަރައްގީގެ މަސައްކަތްތަކެއް އައްޑޫސިޓީގައި އެމްޓިސީސީން ކުރިޔަށްގެންދެއެވެ.
