ރާއްޖެއިން އިތުރު 1299 މީހުން ކޮވިޑް-19 އަށް ޕޮޒިޓިވް ވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްއީއޯސީން ބުނީ ވޭތުވެ ދިޔަ 24 ގަޑި އިރުގެ ތެރޭގައި 5186 ސާމްޕަލެއް ޓެސްޓް ކޮށްފައި ވާއިރު، އޭގެތެރެއިން 1299 މީހަކު ކޮވިޑަށް ޕޮޒިޓިވް ވެފައިވާ ކަމަށެވެ. މިއަދު ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 890 މީހަކާއި، ހިންގަމުން ދާ ރިސޯޓުތަކުން 48 މީހަކާއި މީހުން ދިރިއުޅޭ ރަށްރަށުން ޕޮޒިޓިވްވި 334 އަދި ލިވަބޯޑުން 10 މީހަކާއި ތަރައްގީ ކުރަމުންދާ ރަށަކުން 17 މީހެކެވެ.
މިއަދުގެ ކޮވިޑް އަޕްޑޭޓް:
- މިއަދު ޕޮޒިޓިވްވި އަދަދު: 1299
- ކޮވިޑް އެކްޓިވް ކޭސް: 24،867
- ހޮސްޕިޓަލުގައި އެޑްމިޓް ކޮށްފައިވާ މީހުންގެ އަދަދު: 285
- ކޮވިޑް މަރުގެ ޖުމްލަ އަދަދު: 147
- ޕޮޒިޓިވްވި މީހުންގެ ޖުމްލަ އަދަދު: 59،644
- ބަލިން ރަނގަޅުވި މީހުންގެ ޖުމްލަ އަދަދު 34،621
ކޮވިޑުގައި މިއަދު ތިން މީހުން މަރުވެފައިވާއިރު މިއަދު ފުރަތަމަ މަރުވީ އައްޑޫ ކޮވިޑް ފެސިލިޓިގައި އެޑްމިޓްކޮށްފައި އޮތް 91 އަހަރުގެ ދިވެހި ފިރެހެނެކެވެ. އެއީ މިއަދު ހެނދުނު 10:20 އެވެ. އަދި ދެވަނަ މަރުވީ ހުޅުމާލެ ކޮވިޑް ފެސިލިޓިގައި އެޑްމިޓް ކޮށްފައި އޮތް 61 އަހަރުގެ ދިވެހި ފިރެހެނެކެވެ. އެއީ މެންދުރު 02:35 ގައެވެ. އަދި ތިން ވަނަ މީހާ މަރުވެފައިވަނީ ހުޅުމާލެ މެޑިކަލް ފެސިލިޓިގައި އެޑްމިޓް ކޮށްފައި އޮތް 77 އަހަރުގެ ދިވެހި ފިރެހެނެކެވެ. އެއީ މިރޭ 07:21 ގައެވެ.
މިއަދުން ފެށިގެން ކޮވިޑުން ރައްކާތެރިވުމަށް މާލެ ސަރަހައްދުގައި އަޅާފައިވާ ފިޔަވަޅުތަކުގެ ތެރޭގައި ހަވީރު 4 އިން ފެށިގެން ހެނދުނު 8 އަށް ކާފިއު ހިންގަން ވަނީ ފަށާފައެވެ. ހަމައެއާއެކު ކާފިއު ނޫން ވަގުތު ތަކުގައި ވސް ބޭރަށް މީހުން ނުކުމެ އުޅުމުގައި ހަރުކަށި ފިޔަވަޅުތަކެއް ވަނީ އަޅާފައެވެ. އެ ގޮތުން ކޮންމެ ގޭބިސީއަކަށް ދެ ފާސް ދޫކުރަން ނިންމާފައިވާއިރު އެއިން ފާހެއް އޮވެގެން މެނުވީ ބޭރަަކަށް ނުނިކުމެވޭނެ ކަމަށް އެޗްޕީއޭއިން ވަނީ ނިންމާފައެވެ.
އަދި މި ނިންމުން ތަންފީޒު ކުރާ އިރު މާލެ ސަރަަހައްދު ދެ ޒޯނަކަށް ބާހާލައިގެން މޫވްމަންޓް ކޮންޓްރޯލް ކުރަން މަސައްކަތް ކުރާ ގޮތަށް ވަނީ ހަމަަޖައްސާފައެވެ. އެ ގޮތުން އެއް ޒޯނަކީ ހުޅުމާލެއެވެ. އަނެއް ޒޯނަކީ މާލެއާއި ވިލިމާލެއެވެ. ހުޅުމާލޭގައި ދިރިއުޅޭ މީހަކަށް މާލެއަށް ނޭރޭނެއެވެ. އަދި މާލެއާއި ވިލިމާލޭގައި އުޅޭ މީހަކަށް ހުޅުމާލެއަށް ނޭރޭނެއެވެ.
