ކޮވިޑް ޖެހިގެން އަނެއްކާވެސް ދިވެއްސަކު މަރުވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ މި މީހާ މަރުވެފައިވަނީ މިއަދު ހެނދުނު 10:49 ހާއިރު ހުޅުމާލެ މެޑިކަލް ފެސިލިޓީގައި ފަރުވާދެމުން ދަނިކޮށް ކަމަށާއި އެއީ 62 އަހަރުގެ ދިވެހި އަންހެނެއް ކަމަށެވެ. އަދި މިއީ ރާއްޖެއިން މިހާތަނަށް ކޮވިޑް ޖެހިގެން މަރުވި 125 ވަނަ މީހާ ކަމަށްވެސް އެޗްޕީއޭއިން ބުނެއެވެ.
ރާއްޖެއިން މިހާތަނަށް 125 މީހުން ކޮވިޑް ޖެހިގެން މަރުވެފައިވާއިރު އޭގެތެރެއިން 52 މީހަކީ ކޮވިޑް ޖެހިގެން މޭ މަހު އެކަނި މަރުވެފައިވާ މީހުންނެވެ. މޭ މަހު ކޮވިޑް ޖެހިގެން މަރުވާ މީހުން އިތުރުވެފައިވާއިރު ބަލިޖެހޭ މީހުންގެ އަދަދުވެސް ވަނީ އިތުރު ވެފައެވެ. އެގޮތުން ދުވާލެއްގެ މައްޗަށް 1000 އަށްވުރެ ގިނަ މީހުން އަންނަނީ ކޮވިޑަށް ޕޮޒިޓިވް ވަމުންނެވެ. އިއްޔެގެ އަދަދުތަކަށް ބަލާއިރު މާލެއިން 1،518 މީހުންނާ، އަތޮޅުތެރެއިން 431 މީހުންނާ އަދި ރިސޯޓްތަކުން 11 މީހަކާއެކު މުޅި ޖުމުލަ 1،960 މީހުން ޕޮޒިޓިވްވެފައި ވެއެވެ.
