ކޮވިޑަށް ފަރުވާ ހޯދަމުން ދިޔަ 66 އަހަރުގެ މީހަކު މަރުވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ މިއަދު ހެނދުނު 08:07 ހާއިރު ހުޅުމާލެ މެޑިކަލް ފެސިލިޓީގައި ފަރުވާދެމުން ދިޔަ 66 އަހަރުގެ ދިވެހި ފިރިހެނެއް މަރުވެފައިވާ ކަމަށެވެ. އަދި މިއީ ކޮވިޑް ޖެހިގެން ރާއްޖެއިން މަރުވި 124 ވަނަ މީހާ ކަމަށެވެ.
ކޮވިޑް ޖެހިގެން އިއްޔެވެސް 3 މީހަކު މަރުވެފައި ވެއެވެ. މިއަދު މަރުވި 66 އަހަރުގެ މީހާއާއެކު މި މަހު ކޮވިޑް ޖެހިގެން މަރުވި މީހުންގެ އަދަދު މިވަނީ 51 އަށް އަރާފައެވެ.
ކޮވިޑަށް ޕޮޒިޓިވްވި މީހުންގެ ޖުމުލަ އަދަދު 54،365 އަށް އަރާފައިވާއިރު މިދިޔަ 24 ގަޑިއިރުގެ ތެރޭގައިވެސް 1،960 މީހުން ރާއްޖެއިން ކޮވިޑަށް ޕޮޒިޓިވްވެފައި ވެއެވެ. އަދި ހޮސްޕިޓަލުގައި އެޑްމިޓްކޮށްގެން ފަރުވާދޭ މީހުންގެ އަދަދު 294 އަށް އަރާފައިވާއިރު، މިވަގުތު އެކްޓިވް ކޭސްގެ އަދަދު މިވަނީ 22،421 އަށް އަރާފައެވެ.
