ކޮވިޑް ޖެހިގެން ދިވެހި އަންހެނަކު މަރުވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ މިރޭ 08:25 ހާއިރު ހުޅުމާލޭ މެޑިކަލް ފެސިލިޓީގައި ފަރުވާދެމުން ދިޔަ 39 އަހަރުގެ ދިވެހި އަންހެނަކު މަރުވެފައި ވާކަމަށެވެ. މިއީ ދިވެހި ރާއްޖެއިން ކޮވިޑް ޖެހިގެން މަރުވި 123 މީހާއެވެ.
މިއީ މިއަދު މަރުވި ތިންވަނަ މީހާއެވެ. މިއަދު ފުރަތަމަ މަރުވީ 12:02 ހާއިރު ހުޅުމާލޭ މެޑިކަލް ފެސިލިޓީގައި ފަރުވާދެމުންދިޔަ 48 އަހަރުގެ ދިވެހި ފިރިހެނެކެވެ. ދެވަނަ މީހާ މަރުވެފައިވަނީ މިއަދު ހަވީރު 04:15 ހާއިރުއެވެ. އެއީ ހުޅުމާލޭ މެޑިކަލް ފެސިލިޓީގައި ފަރުވާދެމުންދިޔަ 59 އަހަރުގެ ދިވެހި ފިރިހެނެކެވެ.
ކޮވިޑް ޖެހިގެން އިއްޔެ 4 މީހުން މަރުވެފައިވާއިރު މިމަހު ތެރޭ ކޮވިޑް ޖެހިގެން 50 މީހުން ވަނީ މަރުވެފައެވެ.
މިހާތަނަށް އެންމެ ގިނަ މީހުން މަރުވި ދުވަހެއް ކަމަށް ރިޕޯޓް ކޮށްފައިވާ ދުވަހަކީ މިމަހު 18 ވަނަ ދުވަހެވެ. އެދުވަހު ޖުމްލަ 7 މީހަކު ވަނީ ކޮވިޑުގައި މަރުވެފައެވެ.
މި މަހަކީ ކޮވިޑް ގައި އެންމެ ގިނަ މީހުން މަރުވި އަދި އެންމެ ގިނަ މީހުން ޕޮޒިޓިވްވި މަހެވެ.
