ކޮވިޑް ޖެހިގެން އަނެއްކާވެސް މީހަކު މަރުވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ 72 އަހަރުގެ ދިވެހި ފިރިހެނެއް، މިރޭ 09:00 ހާއިރު މަރުވެފައިވާ ކަމަށެވެ. މިއީ ކޮވިޑް ޖެހިގެން ރާއްޖެއިން މަރުވި 115 ވަނަ މީހާއެވެ.
މިރޭ އިތުރު މީހަކުވެސް ވަނީ ކޮވިޑް ޖެހިގެން މަރުވެފައެވެ. އެއީ މިއަދު ހަވީރުގެ ވަގުތެއްގައި އޭޑީކޭ ހޮސްޕިޓަލުގެ އިމަޖެންސީ ރޫމަށް ގެންދިޔަ އުމުރުން 62 އަހަރުގެ ދިވެހި ފިރިހެނެކެވެ. މިމީހާ މަރުވެފައިވަނީ މިއަދު އިރުއޮއްސި 06:52 ހާއިރުއެވެ.
ކޮވިޑް ޖެހިގެން އެންމެ ގިނަ މީހުން ރާއްޖެއިން މަރުވެފައިވަނީ މި ހިނގާ މޭ މަހުއެވެ. މިމަހު މިހާތަނަށް 43 މީހުން ކޮވިޑް ޖެހިގެން މަރުވެފައިވެއެވެ. އިއްޔެވެސް ވަނީ ކޮވިޑް ޖެހިގެން ރެކޯޑް އަދަދަކަށް މީހުން މަރުވެފައެވެ. އިއްޔެ ޖުމުލަ 7 މީހުން ކޮވިޑް ޖެހިގެން މަރުވެފައިވެއެވެ.
ކޮވިޑަށް ޕޮޒިޓިވްވާ މީހުން އިތުރުވުމާ ކޮންޓެކްޓުން އިތުރުވުމާ ގުޅިގެން މިރޭ އެޗްޕީއޭއިން ވަނީ ކޮންޓެކްޓް ޓްރޭސިން ހެދުމުގެ އުސޫލަށްވެސް ބަދަލުތަކެއް ގެނެސްފައެވެ. އެގޮތުން މާލެ ސަރަހައްދުގައި ދެން ކޮންޓެކްޓް ޓްރޭސިން ހަދާނީ ހަމައެކަނި ހައި ރިސްކް މީހުންގެ އެކަނިކަމަށް އެޗްޕީއޭއިން ވަނީ ބުނެފައެވެ.
