ކޮވިޑް ޖެހިގެން ރާއްޖެއިން އަނެއްކާވެސް މީހަކު މަރުވެއްޖެއެވެ.
ހެލްތް ޕްރޮޓެކްޝަން އޮތޯރިޓީ އެޗްޕީއޭއިން ބުނީ މިއަދު މަރުވެފައިވަނީ ދަރުމަވަންތަ ހޮސްޕިޓަލުގައި ފަރުވާދެމުންދިޔަ 73 އަހަރުގެ ދިވެހި އަންހެނެއް ކަމަށެވެ. އޭނަ މަރުވެފައިވަނީ މިއަދު މެންދުރު 12:10 ހާއިރުކަމަށް އެޗްޕީއޭއިން ބުނެއެވެ.
މި މަރާއެކު ރާއްޖެއިން ކޮވިޑް ޖެހިގެން މަރުވި މީހުންގެ ޖުމުލަ އަދަދު މިވަނީ 104 އަށް އަރާފައެވެ.
ކޮވިޑް ޖެހިގެން ރޭވެސް 2 މީހުން މަރުވެފައި ވެއެވެ. އެކަކީ ކުރީގެ ރައްޔިތުން މަޖިލީހުގެ ގައްދޫ ދާއިރާގެ މެންބަރު ޒާހިރު އާދަމް (ގައްދޫ ޒާހިރު) އެވެ. ޒާހިރު ނިޔާވެފައިވަނީ ރޭ 10:00 ހާއިރު އައިޖީއެމްއެޗްގެ އީއާރުގައި ފަރުވާދެމުން ދަނިކޮށެވެ.
ރޭ ދެވަނައަށް މަރުވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ 79 އަހަރުގެ އަންހެނެކެވެ. އޭނާ މަރުވެފައިވަނީ ރޭ 23:14 ހާއިރުއެވެ.
ރާއްޖޭގައި މި ފާއިތުވާ ހަފްތާއަކީ، އާދަޔާ ހިލާފަށް ކޮވިޑް ޖެހޭ މީހުންގެ އަދަދު މަތީ ހަފްތާއެކެވެ. ކޮންމެ ދުވަހެއްގެ އަދަދުތައް 1000 އިން މަތިން ދާ އިރު، ގިނައީ މާލެ ސަރަހައްދުން ޕޮޒިޓިވް ވާ މީހުންނެވެ. މާލެ ސަރަހައްދުގައި ކޮވިޑަށް ޓެސްޓް ކުރާ ކޮންމެ 3 މީހަކުން 1 އެއް ކޮވިޑަށް ޕޮޒިޓިވް ވެއެވެ.
މިދިޔަ 24 ގަޑިއިރުގެ ތެރޭގައިވެސް ރާއްޖެއިން 1،433 މީހުން ކޮވިޑަށް ޕޮޒިޓިވްވެފައި ވެއެވެ.
