ރައްޔިތުންމަޖިލީހުގެ ގައްދޫ ދާއިރާގެ ކުރީގެ މެންބަރު އަދި ވިޔަފާރިވެރިޔާ ޒާހިރު އާދަމްގެ (ގައްދޫ ޒާހިރު)ގެ ހަނދާނުގައި، ރައްޔިތުންގެ މަޖިލީހުގެ މިއަދުގެ ޖަލްސާގައި ހަމަހިމޭޏްކަމުގެ ސުކޫތެއް ގެނެސްފިއެވެ.
މިއަދުގެ މަޖިލިސް ފައްޓަވަމުން މަޖިލީހުގެ ނައިބު ރައީސް އިވާ އަބްދުﷲ ވަނީ ޒާހިރު އާދަމްގެ އާއިލާއަށް އީވާގެ އަމިއްލަ ނަމުގައްޔާ ރައްޔިތުން މަޖިލީހުގެ ހުރިހާ މެންބަރުންގެ ނަމުގައި ތައުޒިޔާ ފޮނުއްވާފައި ވެއެވެ.
ޒާހިރު ފުރުއްވާފައިވާ މަގާމުތަކުގެ ތެރޭގައި 28 ފެބްރުއަރީ 2005 އިން 26 ޖޫން 2008 ގެ ނިޔަލަށް ރައްޔިތުންގެ ހާއްސަ މަޖިލީހުގެ މެންބަރުކަމުގެ މަގާމާ، 27 ފެބްރުއަރީ 2005 އިން 27 މެއި 2009 ގެ ނިޔަލަށް ރައްޔިތުންގެ މަޖިލީހުގެ ގދ. އަތޮޅުގެ މެންބަރުކަމުގެ މަގާމު އަދި 28 މެއި 2009 އިން 27 މެއި 2014 ގެ ނިޔަލަށް ގައްދޫ ދާއިރާގެ މެމްބަރުކަން ވެސް ކުރައްވާފައިވެއެވެ.
ޒާހިރުގެ ހަނދާން އާކުރައްވާ ރައީސް އިބްރާހީމް މުހައްމަދު ސޯލިހު ކުރެއްވި ޓުވީޓެއްގައި ބުނެފައި ވަނީ ޒާހިރަކީ ރައްޔިތުންގެ ޚާއްޞަ މަޖިލީހާއި ރައްޔިތުންގެ މަޖިލީހުގައި އެކުގައި ވަރަށް ގިނަ ދުވަހު މަސައްކަތް ކުރެއްވި ގާތް ރަޙުމަތްތެރިއެއް ކަމަށާ، ޒާހިރު ނިޔާވިހަބަރު އެހީ ފުން ހިތާމަޔާއެކުކަމަށެވެ.
ޒާހިރު އާދަމް މަރުވެފައިވަނީ ރޭގެ ވަގުތެއްގައެވެ. އުމުރުން 74 އަހަރުވެފައިވާ ޒާހިރު މަރުވިއިރު ވަނީ ކޮވިޑަށް ޕޮޒިޓިވް ވެފައެވެ.
