ހއ. ކެލާގައި ހޯމް ކަރަންޓީންގައި ތިބި 2 މީހަކު ކޮވިޑަށް ޕޮޒިޓިވް ވެއްޖެއެވެ.
އެ ރަށު ކައުންސިލުން ބުނީ، ހއ ކެލާ ވާރޭވިލާ ގޭގައި ހޯމް ކަރަންޓީންގައި ތިބި 3 މީހަކު ކޮވިޑް ޓެސްޓު ހެދުމަށް ސާމްޕަލް ނަގާފައިވާ އިރު އޭގެތެރެއިން 2 މީހެއްގެ ނަތީޖާ ޕޮޒިޓިވް ވެފައިވާ ކަމަށެވެ. އެގޮތުން ޕޮަޒިޓިވް ވެފައިވާ ފަރާތަށް އަވަސް ޝިފާއަކަށް އެދޭ ކަމަށް ކައުންސިލުން ބުނެއެވެ.
ހޯމް ކަރަންޓީނަށް އެރަށަށް މާލެއިން ގޮސް ތިބޭ މީހުންނަށް ޒިޔާރަތް ކުރުމަކީ ރައްކާތެރި ކަމެއް ނޫން ކަމަށާއި އަދި އެއީ ހެލްތު ޕްރޮޓެކްޗަން އެޖެންސީ (އެޗްޕީއޭ) އިން މަނާ ކޮށްފައިވާ ކަމެއް ކަމަށް ކެލާ ކައުންސިލުން ބުނެއެވެ.
ކޮވިޑް ފެތުރުން ހުއްޓުވުމަށްޓަކައި ފަރުދީ ޒިންމާ އަދާ ކުރުމަށް ހޯމް ކަރަންޓީން ގައި ތިބޭ ފަރާތްތަކަށް ޒިޔާރަތް ކުރުން ހުއްޓާލުމަށް އެ ކައުންސިލުން އިލްތިމާސް ކުރެއެވެ.
ކެލާ އިން މީގެ ކުރިން ވެސް ވަނީ އެކްޓިވް ކޭސްތައް ފެނިފައެވެ.
ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދު އިންތިހާއަށް އިތުރުވަމުން ދާއިރު އިއްޔެ ވެސް ވަނީ 1007 މީހަކު ކޮވިޑަށް ޕޮޒިޓިވް ވެފައެވެ. އެއާއެކު ރާއްޖެއިން ޕޮޒިޓިވްވި މީހުންގެ އަދަދު ވަނީ 43،782 އަށް އަރާފައެވެ. އަދި މި ބަލީގައި 94 މީހަކު ވަނީ މަރުވެފައެވެ.
