އެމްއެމްޕީއާރުސީ ހިޔާނާތަކީ މި ފަހުގެ ތާރީހުގައި ހިންގާފައި އޮތް އެންމެ ބޮޑު ހިޔާނާތެވެ. މިދިޔަ އަހަރު ފެބްރުއަރީ މަހުގެ ތެރޭގައި އޭސީސީން އާއްމުކުރި އެމްއެމްޕީއާރްސީގެ ތަހުގީގު ރިޕޯޓުގައި ބުނެފައި ވަނީ 155 މީހެއްގެ އެކައުންޓަށް ހިޔާނާތުގެ ފައިސާ ވަދެފައި ވާކަމަށާ 57 ރަށެއްގެ މައްސަލަ ބަލާފައިވާ ކަމަށެވެ. އެ ރަށްތަކުގެ އެކުއިޒިޝަން ކޮސްޓްގެ ގޮތުގައި ލިބުނު ފައިސާ އެމްއެމްޕީއާރުސީގެ އެކައުންޓްތަކަށް ޖަމާނުކޮށް ޗެކް އެންޑޯސްކޮށްގެން އެކިއެކި އަމިއްލަ ފަރާތްތަކުގެ އެކައުންޓްތަކަށް ޖަމާކޮށްފައިވާ ކަމަށް ވެސް ރިޕޯޓުގައި ބުނެފައިވެއެވެ.
އޭސީސީގެ ރިޕޯޓާ ގުޅިގެން މީގެ ކުރިން ރައީސް އިބްރާހީމް މުހައްމަދު ސޯލިހު ވަނީ، އޭސީސީގެ ރިޕޯޓުގައި ހުރި ވަކިވަކި މީހުންގެ މައްސަލަތައް ބަލާ، ކުށްވެރިވާ ފަރާތްތަކަށް ދައުވާ ކުރަން ފޮނުވާ، އަދި ކުށްވެރި ނުވާ ފަރާތްތަކުގެ ކުށެއް ނެތް ކަމަށް ކަނޑައަޅައި ދިނުމަށް އޭސީސީ އަށް ގޮވާލައްވާފައެވެ.
އެމްއެމްޕީއާރުސީ މައްސަލަ ނުބެލި ދިގުލައިގެން ގޮސްފައިވާއިރު އެމްއެމްޕީއާރުސީ ހިޔާނާތުގެ ކަޅު ފައިސާގައި ޖެހިފައިވާ ކަމަށް ތުހުމަތު ކުރެވޭ މީހުންގެ ލިސްޓް މިހާރު ވަނީ އާންމުކޮށްފައެވެ.
އެލިސްޓު މިއަދު އާންމުކޮށްފައި ވާއިރު އެ ލިސްޓުގައިވާ 119 މީހަކީ މަގާމުތަކުގައި ތިއްބެވި މީހުންނެވެ.
މަޖިލީހުގެ ޖުޑީޝަރީ ކޮމިޓީއާއި 241 ކޮމިޓީ ގުޅިގެން އުފެއްދި ސަބް ކޮމިޓީން އެކުލަވައިލި ރިޕޯޓްގައި ވަނީ އެމީހުންނާމެދު 8 ކަމެއް ކުރަން ހުށަހަޅާފައެވެ. އޭގެތެރެއިން އެފަދަ ތުހުމަތުއޮތް މީހުން ތިބި މަގާމުތަކުން ވަކިކުރުން ހިމެނެއެވެ. އަދި އެމީހުންގެ ތެރެއިން އިންތިހާބީ މަގާމުތަކުގައި ތިބި މީހުން ވަކި ކުރެވޭނީ ޝަރުއީ ހުކުމަކުން ނުވަތަ އެ ފަރާތްތައް އަމިއްލައަށް އިސްތިއުފާ ދިނުމުން ކަމަށް ވާތީ، އެފަދަ ފަރާތްތަކުގެ ތަހުގީގު އަވަސްކުރަން އެސެޓް ރިކަވަރީ ކޮމިޝަނަށް އެންގުމަށް ރިޕޯޓްގައި ވެއެވެ.
ހަމައެއާއެކު މިހާތަނަށް ތަހުގީގު ނިމިފައިވާ ފަރާތްތަކުގެ އަތުން ފައިސާ އަނބުރާ ހޯދަން ދައުލަތުގެ ކަމާ ބެހޭ އިދާރާތަކުގައި ދެންނެވުމާއި އެކަން ކުރިއަށްދާ ގޮތް މަޖިލީހުން ބެލުން ހިމެނެއެވެ. ތަހުގީގު ކުރިއަށް ދާއިރު ތުހުމަތުވާ ފަރާތްތަކަށް މިހާރުން މިހާރަށް އެޅެން ހުރި އެހެން ފިޔަވަޅުތައް އެޅުމަށް ވެސް ރިޕޯޓްގައި ހިމަނާފައި ވެއެވެ.
ލިސްޓުގައިވާ 119 މީހުންނަށް ފިޔަވަޅު އަޅަން ހުށަހަޅާފައިވާއިރު އުފެދޭ ސުވާލަކީ ލިސްޓުގައި ހިމެނޭ 16 މަޖިލިސް މެންބަރުންނަށް އަޅާނީ ކޮން ފިޔަވަޅެއް ހެއްޔެވެ؟
ލީކުވެފައިވާ ލިސްޓުގައި ރައްޔިތުންގެ މަޖިލީހުގެ 16 މެންބަރުން ހިމެނޭއިރު އޭގެ ތެރޭގައި އެމްޑީޕީ މެމްބަރުންނާއި ޕީޕީއެމް/ޕީއެންސީ މެންބަރުން އަދި ޖުމްހުރީ ޕާޓީގެ މެންބަރުން ހިމެނެއެވެ.
ލިސްޓުގައި ހިމެނޭ އެމްޑީޕީ މެންބަރުން:
- އެމްޑީޕީގެ ޕާލިމަންޓަރީ ގުރޫޕުގެ ލީޑަރު އަލީ އާޒިމް - 1 މިލިއަން ރުފިޔާ
- ހެންވޭރު ހުޅަނގު ދާއިރާގެ ހަސަން ލަތީފް - 5 މިލިއަން ރުފިޔާ
- މަރަދޫ ދާއިރާގެ މެންބަރު އިބްރާހީމް ޝަރީފް - 88.8 މިލިއަން ރުފިޔާ
- ކެނދިކުޅުދޫ ދާއިރާގެ މެމްބަރު އަހުމަދު އީސާ - 5 ލައްކަ ރުފިޔާ
ލިސްޓުގައި ހިމެނޭ ޕީޕީއެމް/ޕީއެންސީ މެމްބަރުން:
- މާވަށު ދާއިރާގެ މުހައްމަދު ސައީދު - 8.3 މިލިއަން
- ތ. ގުރައިދޫ ދާއިރާ މެންބަރު ޣައްސާން މައުމޫން - 2 މިލިއަން 5 ލައްކަ ރުފިޔާ
- ނައިފަރު ދާއިރާގެ މެންބަރު އަހްމަދު ޝިޔާމް - 1 މިލިއަން ރުފިޔާ
- މަހިބަދޫ ދާއިރާގެ މެންބަރު އަހްމަދު ތޯރިގު (ޓޮމް) - 4.7 މިލިއަން ރުފިޔާ
- ރައްޔިތުންގެ މަޖިލީހުގެ މެންބަރު މުހައްމަދު ހުސައިން ލަތީފު (ސެމްބެ) - 1.8 މިލިއަން ރުފިޔާ
- އޭދަފުށީ ދާއިރާގެ މެންބަރު އަހްމަދު ސަލީމް - 26.5 މިލިއަން ރުފިޔާ
- ކ. ގުރައިދޫ ދާއިރާގެ މެންބަރު އިބްރާހިމް ރިޒާ - 1.5 މިލިއަން ރުފިޔާ
އަމިއްލަ / އެހެނިހެން ޕާޓީ:
- ވިލިނގިލި ދާއިރާގެ މެންބަރު ސައުދު ހުސައިން (އަމިއްލަ) - 2 މިލިއަން ރުފިޔާ
- ނިލަންދޫ ދާއިރާގެ މެންބަރު އަބްދުލް މުހްސިން ހަމީދު (އެމްއާރުއެމް) - 3 ލައްކަ 30 ހާސް ރުފިޔާ
- ކުޑަހުވަދޫ ދާއިރާގެ މެންބަރު އަހްމަދު އާމިރު - 1 މިލިއަން ރުފިޔާ
ޖުމްހޫރީ ޕާޓީގެ މެންބަރުން:
- ދަނގެތި ދާއިރާގެ މެންބަރު މުހައްމަދު ނާޒިމް - 5.9 މިލިއަން ރުފިޔާ
- ކެންދޫ ދާއިރާގެ މެންބަރު އަލީ ހުސައިން - 5 ލައްކަ ރުފިޔާ
މި 16 މެންބަރުންނާ މެދު އަޅާނީ ކޮންކަހަލަ ފިޔަވަޅެއްތޯ، އެއީ މިހާރު އެންމެންގެ ހިތުގައި ވެސް އުފެދޭނެ އެއް ސުވާލެއެވެ. މަގާމުތަކުގައި ތިބި 119 މީހުން މަގާމުން ވަކި ކުރާނަމަ، މަޖިލިސް މެންބަރުންނާ މެދު އަމަލު ކުރާނީ ކިހިނެތް ހެއްޔެވެ؟ ކޮންމެއަކަސް މި ހިޔާނާތުގައި ހިމެނޭ އެންމެންނާ މެދުވެސް ފިޔަވަޅު އެޅުމަކީ މުހިންމު ކަމެކެވެ. އަދި އެކަން އަވަސް ސްޕީޑެއްގައި ކުރިއަށް ދިއުމަކީ މުހިންމު ކަމެެކެވެ.
